अर्धापूर १ एप्रिल (प्रतिनिधी)
नांदेड जिल्ह्यामध्ये अवैध धंद्यांविरुद्ध पोलिसांनी कंबर कसली असून, स्थानिक गुन्हे शाखेने (LCB) अर्धापूर पोलीस ठाण्याच्या हद्दीत धडक कारवाई केली आहे. या कारवाईत ४ किलो ५१० ग्रॅम गांजा आणि एक कार, असा एकूण ६ लाख ७५ हजार ५०० रुपयांचा मुद्देमाल जप्त करण्यात आला असून दोन आरोपींविरुद्ध गुन्हा दाखल करण्यात आला आहे.
नेमकी घटना काय?
नांदेडचे पोलीस अधीक्षक अबिनाश कुमार यांनी जिल्ह्यातील अवैध धंद्यांचे समूळ उच्चाटन करण्याचे आदेश दिले होते. या अनुषंगाने स्थानिक गुन्हे शाखेचे पोलीस निरीक्षक उदय खंडेराय यांच्या मार्गदर्शनाखाली पथक कार्यरत असताना, सहायक पोलीस निरीक्षक रवि वाहुळे यांना गोपनीय माहिती मिळाली. अर्धापूर हद्दीतील भाऊराव चव्हाण साखर कारखान्याकडे जाणाऱ्या रोडवर, दशरथ कपाटे यांच्या शेताजवळ काही इसम अमली पदार्थ (गांजा) बाळगून असल्याची खात्रीशीर माहिती मिळाली होती.
पोलीस छापा आणि जप्ती:
मिळालेल्या माहितीच्या आधारे पोलीस अधिकारी, अंमलदार आणि शासकीय पंचांच्या उपस्थितीत सदर ठिकाणी छापा टाकला असता, एक ‘स्विफ्ट डिझायर’ कार (क्रमांक MH 24 AF 1807) संशयास्पदरीत्या मिळून आली. या कारची झडती घेतली असता त्यात २,२५,५०० रुपये किमतीचा ४ किलो ५१० ग्रॅम गांजा सापडला. पोलिसांनी गांजासह ४,५०,००० रुपये किमतीची कार, असा एकूण ६,७५,५०० रुपयांचा मुद्देमाल जप्त केला आहे.
आरोपींची माहिती:
या प्रकरणात पोलिसांनी दोन जणांविरुद्ध गुन्हा दाखल केला आहे:
१. शेख आरबाज शेख बाबू (वय २२ वर्षे, व्यवसाय: मजुरी, रा. रशिद टेकडी, भोकर) – याला ताब्यात घेण्यात आले आहे.
२. शेख फयुम शेख मुफ्तु (रा. सईदनगर, भोकर) – हा आरोपी सध्या फरार असून पोलीस त्याचा शोध घेत आहेत.
पोलीस पथक:
सदर कारवाई पोलीस अधीक्षक अबिनाश कुमार, अप्पर पोलीस अधीक्षक (भोकर) श्रीमती अर्चना पाटील, आणि अप्पर पोलीस अधीक्षक (नांदेड) सुरज गुरव यांच्या मार्गदर्शनाखाली पार पडली. या पथकात स्थानिक गुन्हे शाखेचे पोलीस निरीक्षक उदय खंडेराय, सपोनि रवि वाहुळे, ग्रेड पोलीस उपनिरीक्षक माधव केंद्रे, बळीराम दासरे आणि अंमलदार गुंडेराव करले, दिलीपकुमार चंचलवार, उमर शेख, मोतीराम पवार, संजय च्यापलवार, सिद्धार्थ सोनसळे यांचा समावेश होता.
या यशस्वी कामगिरीबद्दल पोलीस अधीक्षक अभिनश कुमार यांनी संपूर्ण पथकाचे कौतुक केले आहे. अर्धापूर पोलीस ठाण्यात एनडीपीएस (NDPS) ॲक्टनुसार या प्रकरणाचा पुढील तपास सुरू आहे.
- प्रतिनिधी, माधव वाघमारे
