नांदेड/ ९ एप्रिल प्रतिनिधी माधव वाघमारे
नागपूर येथे नुकत्याच पार पडलेल्या ६९ व्या अखिल भारतीय पोलीस कर्तव्य मेळाव्यात (AIPDM) नांदेड परिक्षेत्रातील परभणी पोलीस दलाच्या ‘टायसन’ या श्वानाने आपल्या अचाट कौशल्याच्या जोरावर सुवर्ण आणि रौप्य पदकाची कमाई केली आहे. या यशाने केवळ नांदेड परिक्षेत्राचेच नव्हे, तर संपूर्ण महाराष्ट्र पोलीस दलाचे नाव राष्ट्रीय पातळीवर उंचावले आहे.

मेळाव्याचा तपशील आणि चुरस

२९ मार्च ते ३ एप्रिल २०२६ दरम्यान राज्य राखीव पोलीस बल, गट क्र. ०४, नागपूर येथे हा मेळावा संपन्न झाला. यामध्ये भारतातील २८ घटक राज्ये, ८ केंद्रशासित प्रदेश आणि सीमा सुरक्षा बल (BSF), NSG, CISF, ITBP यांसारख्या प्रमुख सुरक्षा दलांचे एकूण १४८ श्वान सहभागी झाले होते. या अत्यंत कठीण स्पर्धेत महाराष्ट्र पोलीस दलाचे प्रतिनिधित्व करण्याचा मान परभणीच्या ‘टायसन’ला मिळाला होता.

‘टायसन’ची सुवर्ण आणि रौप्य पदकावर मोहोर

टायसनने त्याच्या हँडलर्ससह उत्कृष्ट ताळमेळ दाखवत दोन महत्त्वाच्या गटात पदके पटकावली:

• सुवर्ण पदक: ‘सीक अँड फाईड’ (Seek and Find) या प्रकारात प्रथम क्रमांक.
• रौप्य पदक: ‘आज्ञाधारकता’ (Obedience) आणि ‘अज्ञात व्यक्तीने दिलेले अन्न नाकारणे’ (Refusal of Food) या कठीण चाचणीत द्वितीय क्रमांक.

यशाचे मानकरी: हँडलर्स आणि मार्गदर्शक

टायसनच्या या यशामागे त्याचे हँडलर पोलीस हवालदार रामचंद्र जाधव आणि पोलीस शिपाई सादिक पठाण यांची अपार मेहनत आहे. परभणीचे पोलीस अधीक्षक श्री. रवींद्रसिंह परदेशी, अपर पोलीस अधीक्षक आणि कंधार विभागाच्या पोलीस उपाधीक्षक श्रीमती अश्विनी जगताप यांच्या मार्गदर्शनाखाली हे प्रशिक्षण पूर्ण झाले होते.

२५,००० रुपयांचे पारितोषिक जाहीर

या ऐतिहासिक कामगिरीची दखल घेत नांदेड परिक्षेत्राचे पोलीस उप महानिरीक्षक श्री. शहाजी उमाप यांनी श्वान पथकातील अधिकारी व अंमलदारांचे अभिनंदन केले आहे. तसेच, या पथकास २५,००० रुपयांचे रोख बक्षीस आणि प्रशंसापत्र देऊन गौरविण्यात आले आहे.

टायसनची आजवरची चमकदार कामगिरी

२०२२ मध्ये पोलीस दलात दाखल झाल्यापासून टायसनने सातत्याने आपली गुणवत्ता सिद्ध केली आहे:

• २०२२: सीआयडी पुणे येथे विशेष प्रशिक्षण पूर्ण.
• २०२३: नांदेड परिक्षेत्र कर्तव्य मेळाव्यात सुवर्ण पदक.
• २०२५: महाराष्ट्र राज्य पोलीस कर्तव्य मेळाव्यात रौप्य पदक.
• तपास कार्य: चोरी, दरोडा, खून आणि मिसिंग प्रकरणांच्या तपासात टायसनची मोलाची मदत झाली आहे.
  या यशाबद्दल संपूर्ण पोलीस दलातून टायसन आणि त्याच्या पथकावर कौतुकाचा वर्षाव होत आहे.