नांदेड १७ एप्रिल प्रतिनिधी
शहरातील सार्वजनिक शांतता अबाधित राखण्यासाठी आणि उघडपणे मद्यप्राशन करणाऱ्या तळीरामांना चाप लावण्यासाठी नांदेड पोलिसांनी विशेष मोहीम हाती घेतली आहे. पोलीस अधीक्षक अबिनाश कुमार यांच्या मार्गदर्शनाखाली ‘सिटी स्ट्रीट सेफ्टी ड्राईव्ह’ पथकाने १५ आणि १६ एप्रिल रोजी शहरात विविध ठिकाणी छापे टाकून ३७ जणांवर कायदेशीर कारवाई केली आहे. या कारवाईत विनापरवाना वाहन चालवणाऱ्या ११ वाहनांवरही दंडात्मक कारवाई करण्यात आली असून एकूण १४,००० रुपयांचा दंड वसूल करण्यात आला आहे.

विविध पोलीस ठाण्यांतर्गत झालेली कारवाई:

१) भाग्यनगर परिसर:
सिटी स्ट्रीट सेफ्टी पथकाने भाग्यनगर, रबाडी चौक आणि सम्राट चौक परिसरात गस्त घालत असताना २८ व्यक्तींना सार्वजनिक ठिकाणी मद्यप्राशन करून गोंधळ घालताना रंगेहाथ पकडले. त्यांच्यावर महाराष्ट्र पोलीस कायदा कलम ११०/११७ नुसार कारवाई करण्यात आली. तसेच एका विना नंबरच्या वाहनावर ५०० रुपयांचा दंड आकारण्यात आला.
२) नांदेड ग्रामीण व इतवारा:
नांदेड ग्रामीण हद्दीतील एमआयडीसी परिसरात २ जण, तर इतवारा पोलीस ठाण्याच्या हद्दीतील मयापको रोडवर २ जण मद्यप्राशन करताना आढळले. या चौघांवरही प्रतिबंधात्मक कारवाई करण्यात आली आहे.
३) शिवाजीनगर:
शिवाजीनगर परिसरात विना परवाना आणि ट्रिपल सीट प्रवास करणाऱ्या १० वाहनांवर मोटार वाहन कायद्यांतर्गत कारवाई करण्यात आली. या वाहनधारकांकडून १३,५०० रुपयांचा दंड वसूल करण्यात आला आहे.
४) दामिनी पथकाची कारवाई:
महिलांच्या सुरक्षिततेसाठी कार्यरत असलेल्या दामिनी पथकाने विसावा गार्डन आणि भाग्यनगर परिसरात आरडाओरड करून शांतता भंग करणाऱ्या ५ जणांना ताब्यात घेऊन त्यांच्यावर गुन्हे दाखल केले आहेत.

शाळा-महाविद्यालयांच्या परिसराची तपासणी

या मोहिमेदरम्यान केवळ तळीरामांवर कारवाई करून पोलीस थांबले नाहीत, तर पथकाने शहरातील विविध शाळा, महाविद्यालये आणि कोचिंग क्लासेस परिसराचीही बारकाईने पाहणी केली. तसेच परिसरातील दारूची दुकाने, वाईन शॉप आणि हॉटेल्सची तपासणी करून नियमांचे उल्लंघन होणार नाही, याची दक्षता घेण्याच्या सूचना दिल्या.

पोलीस अधीक्षकांचे आवाहन

नांदेडचे पोलीस अधीक्षक अबिनाश कुमार यांनी नागरिकांना आवाहन केले आहे की, कोणीही सार्वजनिक ठिकाणी मद्यप्राशन करू नये किंवा मद्यपींना जागा उपलब्ध करून देऊ नये. सार्वजनिक शांततेचा भंग करणाऱ्यांविरुद्ध यापुढेही अशीच कडक कारवाई सुरू राहील, असा इशारा त्यांनी दिला आहे.
बातमी: प्रतिनिधी माधव वाघमारे, नांदेड