नांदेड २१ एप्रिल प्रतिनिधी
शहरातील वाढत्या चोरी आणि घरफोड्यांच्या घटनांना आळा घालण्यासाठी नांदेड पोलिसांनी धडक मोहीम हाती घेतली आहे. भाग्यनगर पोलीस स्टेशनच्या गुन्हे शोध पथकाने अत्यंत प्रभावी कामगिरी करत तब्बल १० घरफोड्यांचे गुन्हे उघडकीस आणले आहेत. या कारवाईत पोलिसांनी सोने-चांदीचे दागिने आणि वाहनांसह एकूण ७८ लाख ३५ हजार ६० रुपयांचा मुद्देमाल जप्त केला असून ५ आरोपींना बेड्या ठोकल्या आहेत.
अशी झाली कारवाई
पोलीस अधीक्षक अभिनविनाश कुमार यांनी जिल्ह्यातील चोरी व घरफोडीचे गुन्हे उघडकीस आणण्याचे आदेश सर्व पोलीस ठाण्यांना दिले होते. यादरम्यान, भाग्यनगर पोलीस ठाण्याच्या हद्दीत झालेल्या एका चोरीचा व्हिडिओ सोशल मीडियावर व्हायरल झाला होता. या क्लिपच्या आधारे आणि सीसीटीव्ही फुटेजच्या तांत्रिक विश्लेषणाद्वारे (Damp Data & CDR) पोलिसांनी संशयितांचा माग काढला.
गोपनीय माहितीच्या आधारे पोलिसांनी सापळा रचून तिघांना ताब्यात घेतले. त्यांची सखोल चौकशी केली असता, त्यांनी भाग्यनगर, शिवाजीनगर आणि विमानतळ पोलीस ठाण्याच्या हद्दीत एकूण १० ठिकाणी घरफोड्या केल्याची कबुली दिली.
जप्त केलेला मुद्देमाल
पोलिसांनी आरोपींकडून खालील मुद्देमाल हस्तगत केला आहे:
- सोन्याचे दागिने: ४४.५ तोळे (किंमत अंदाजे ६८,८०,८५० रुपये)
- चांदीचे दागिने: १७१.४ तोळे (किंमत अंदाजे ४,५४,२१० रुपये)
- वाहने: १ मारुती कार, ३ मोटारसायकल आणि इतर साहित्य (किंमत ५,००,००० रुपये)
- एकूण किंमत: ७८,३५,०६० रुपये.
अटक केलेले आरोपी
१. सोहेल अब्दुल सत्तार (वय १९ वर्षे, रा. जवाहर नगर, नांदेड)
२. प्रदीपकुमार विरेंद्रप्रसाद कौरी (वय १९ वर्षे, रा. धनेगाव, नांदेड)
३. अर्जुन पुरुषोत्तम मोरे (वय २४ वर्षे, रा. चौफाळा, नांदेड)
४. शेख नईम शेख मैनुद्दीन (वय २२ वर्षे, रा. कौलास नगर, नांदेड)
५. आशा हरिश्चंद्र तेलंग (वय ५६ वर्षे, रा. शाहू नगर, नांदेड)
(यांच्यासह एका विधीसंघर्षग्रस्त बालकाचाही समावेश आहे.)
तपास पथक
ही यशस्वी कामगिरी पोलीस अधीक्षक अबिनाश कुमार, अपर पोलीस अधीक्षक अर्चना पाटील, सुरज गुरव, उपविभागीय पोलीस अधिकारी रामेश्वर वैंजणे आणि सहाय्यक पोलीस अधीक्षक शशांक एन.एम. यांच्या मार्गदर्शनाखाली पार पडली.
या पथकात भाग्यनगर पोलीस ठाण्याचे पोलीस निरीक्षक संतोष तांबे, गुन्हे शोध पथकाचे पोलीस उपनिरीक्षक विनोद देशमुख, नरेश वाडेवाले आणि त्यांच्या सहकाऱ्यांचा समावेश होता. या उल्लेखनीय कामगिरीबद्दल पोलीस अधीक्षकांनी संपूर्ण पथकाचे कौतुक केले आहे.
बातमी लेखन:
प्रतिनिधी माधव वाघमारे
