नांदेडक रांची तहान भागणार उन्हाळ्यात पाणी टंचाई भासणार नाही महापौरांचे पाणीपुरवठा विभागाला अ‍ॅक्शन मोड वर राहण्याचे आदेश

नांदेड ५ मे प्रतिनिधी
राज्यात उन्हाळ्याचा तडाखा वाढत असताना नांदेड शहरात मात्र पाणी टंचाईचे सावट निर्माण होऊ नये, यासाठी महापालिका प्रशासन सज्ज झाले आहे. “नांदेड शहरात पुरेसा जलसाठा उपलब्ध आहे, त्यामुळे नागरिकांना पाणी टंचाईचा सामना करावा लागू नये. वितरणातील तांत्रिक त्रुटी तातडीने दूर करून शहराच्या शेवटच्या टोकापर्यंत पाणी पोहोचवा,” असे सक्त निर्देश महापौर सौ. कविता संतोष मुळे यांनी दिले आहेत.
मंगळवार, ५ मे रोजी महापालिका मुख्यालयात पाणीपुरवठा विभागाची विशेष आढावा बैठक पार पडली. या बैठकीला पालिका आयुक्त डॉ. महेशकुमार डोईफोडे, उपमहापौर दिपकसिंह रावत, स्थायी समिती सभापती विरेंद्रसिंघ गाडीवाले यांच्यासह विविध विभागांचे पदाधिकारी व अधिकारी उपस्थित होते.

पाणी कपातीचे संकट टळले

बैठकीत पाणीपुरवठा विभागाने शहरातील सद्यस्थितीचे सादरीकरण केले. विष्णुपूरी धरणात यंदा मुबलक पाणीसाठा उपलब्ध असल्याने शहरावर पाणी कपातीचे कोणतेही संकट नसल्याचे महापौरांनी स्पष्ट केले. मात्र, उपलब्ध पाण्याचे नियोजन चोख असणे गरजेचे असल्याचे त्यांनी नमूद केले.

गळती रोखा आणि दाबाने पुरवठा करा

शहरातील जलवाहिन्यांमध्ये होणारी गळती हा चिंतेचा विषय असून, दुरुस्ती कामांना प्राधान्य देण्याच्या सूचना देण्यात आल्या आहेत. विशेषतः नवीन वसाहती आणि ज्या भागात कमी दाबाने पाणी येते, तिथे तांत्रिक उपाययोजना करून पुरवठा सुरळीत करण्याचे नियोजन करण्याचे आदेश महापौरांनी दिले. तसेच, वीज पुरवठा खंडित झाल्यामुळे पाणी उपसा केंद्रांवर परिणाम होऊ नये, यासाठी ‘महावितरण’शी समन्वय राखण्याचे निर्देश शहर अभियंता व कार्यकारी अभियंत्यांना दिले.

अमृत २.० योजनेवर भर

आगामी काळात ‘अमृत २.०’ योजनेअंतर्गत शहराच्या पाणीपुरवठा व्यवस्थेत मोठ्या सुधारणा केल्या जाणार आहेत. कौठा भागातील मीटर यंत्रणेचा प्रायोगिक आढावा घेऊन तांत्रिक बिघाड दुरुस्त करण्यावरही बैठकीत चर्चा करण्यात आली.

“नांदेडकरांना स्वच्छ आणि पुरेसे पाणी मिळणे हा त्यांचा हक्क आहे. कोणत्याही प्रभागातून तक्रार आल्यास संबंधित अधिकाऱ्याला जबाबदार धरले जाईल. प्रशासनाने २४ तास तक्रार निवारण यंत्रणा सक्रिय ठेवावी.
सौ. कविता संतोष मुळे, महापौर, नांदेड.

नागरिकांना आवाहन:
प्रशासकीय पातळीवर नियोजन सुरू असतानाच, नागरिकांनीही पाण्याचा अपव्यय टाळावा. पिण्याचे पाणी बागेसाठी किंवा गाड्या धुण्यासाठी वापरू नये, असे आवाहन महापालिकेतर्फे करण्यात आले आहे.
बातमी: प्रतिनिधी माधव वाघमारे, नांदेड.