नांदेड ६ मे प्रतिनिधी
नांदेड जिल्ह्याचे पोलीस अधीक्षक मा. श्री. अबिनाश कुमार यांच्या मार्गदर्शनाखाली जिल्हयात अवैध धंद्यांविरुद्ध राबविण्यात येत असलेल्या ‘ऑपरेशन क्रॅकडाऊन’ अंतर्गत स्थानिक गुन्हे शाखेने मोठी कारवाई केली आहे. शहराच्या देगलूर नाका परिसरातील चुनाभट्टी भागात छापा टाकून पोलिसांनी सुमारे १५ लाख ९८ हजार ४२९ रुपये किमतीचा प्रतिबंधित गुटखा, पानमसाला आणि सुगंधित जर्दा जप्त केला आहे.
नेमकी घटना काय?
मिळालेल्या गोपनीय माहितीनुसार, ५ मे २०२६ रोजी स्थानिक गुन्हे शाखेच्या पथकाने नांदेड शहरातील चुनाभट्टी भागात एका घराची झडती घेतली. यावेळी एका पोल्ट्री फार्मच्या मागे लपवून ठेवलेला महाराष्ट्र शासनाने प्रतिबंधित केलेला गुटखा आणि सुगंधित तंबाखूचा मोठा साठा आढळून आला. पोलिसांनी त्वरित कारवाई करत हा सर्व मुद्देमाल जप्त केला.
आरोपींची माहिती
या प्रकरणी पोलिसांनी दोन जणांविरुद्ध गुन्हा दाखल केला आहे:
१. मोहम्मद सुफियान मोहम्मद शब्बीर (वय २४ वर्षे, रा. रहेमतनगर, देगलूर नाका, नांदेड).
२. सय्यद सज्जाद अली (रा. चुनाभट्टी, देगलूर नाका, नांदेड).
तपासादरम्यान, जप्त केलेला माल हा सय्यद सज्जाद अली याच्या मालकीचा असल्याचे निष्पन्न झाले आहे. याप्रकरणी इतवारा पोलीस ठाण्यात अन्न सुरक्षा मानके अधिनियमाच्या विविध कलमान्वये गुन्हा दाखल करण्यात आला आहे.
यांनी केली कारवाई
ही धडक कारवाई पोलीस अधीक्षक अबिनाश कुमार, अपर पोलीस अधीक्षक अर्चना पाटील (भोकर), आणि अपर पोलीस अधीक्षक सुरज गुरव यांच्या मार्गदर्शनाखाली स्थानिक गुन्हे शाखेचे पोलीस निरीक्षक अतुल भोसले, पोलीस उपनिरीक्षक महेश कोरे आणि त्यांच्या पथकातील अंमलदार मोहन हाके, संघरत्न गायकवाड, श्रीराम दासरे, माधव माने, मनोज राठोड आणि चापोकॉ देवकते यांनी यशस्वीरित्या पार पाडली.
नांदेड पोलिसांनी केलेल्या या मोठ्या कारवाईचे पोलीस अधीक्षकांकडून विशेष कौतुक करण्यात आले आहे.
बातमी: प्रतिनिधी माधव वाघमारे
