नांदेड १६ मे (प्रतिनिधी, माधव वाघमारे)
मानवतेला काळिमा फासणाऱ्या एका घटनेत, अंध दाम्पत्य असल्याचा गैरफायदा घेऊन सोन्याचे दागिने चोरणाऱ्या अज्ञात महिला आरोपीला नांदेड ग्रामीण पोलिसांनी अत्यंत तपासाची चक्रे फिरवून अवघ्या दोन तासांत अटक केली आहे. पोलिसांनी महिलेकडून चोरीला गेलेला १०० टक्के मुद्देमाल जप्त केला असून, गुन्हा दाखल झाल्यापासून अवघ्या १२ तासांच्या आत न्यायालयात दोषारोपपत्र (चार्जशीट) दाखल करून एक नवा वस्तुपाठ घालून दिला आहे.
नेमकी घटना काय?
मिळालेल्या माहितीनुसार, सिडको नांदेड येथील रहिवासी सागर श्री. साईनाथ सुनगुरू (वय २७ वर्ष) आणि त्यांची पत्नी हे दोघेही पूर्णतः दृष्टिहीन (अंध) आहेत. दिनांक १३ मे २०२६ रोजी दुपारी १ ते २ वाजेच्या सुमारास फिर्यादी महिला आपल्या घरासमोर केस विंचरत असताना, त्यांनी गळ्यातील सोन्याचे मंगळसूत्र काढून बाजूला ठेवले होते. दोघेही अंध असल्याचा गैरफायदा घेत एका अज्ञात चोरट्याने ते २ ग्रॅम वजनाचे सोन्याचे मंगळसूत्र (किंमत अंदाजे २०,००० रुपये) चोरून पोबारा केला.
यासंदर्भात फिर्यादी यांनी दिनांक १५ मे २०२६ रोजी सायंकाळी ५:४१ वाजता नांदेड ग्रामीण पोलीस ठाण्यात तक्रार दिली. पोलिसांनी तात्काळ भारतीय न्याय संहिता (BNS) कलम ३०३(२) अंतर्गत गुन्हा रजि. नं. ५५८/२०२६ नुसार गुन्हा दाखल केला.
गुप्त माहिती आणि अवघ्या २ तासांत अटक
नांदेडचे पोलीस अधीक्षक श्री. अबिनाश कुमार यांनी जिल्ह्यात गुन्हेगारांवर वचक बसवण्यासाठी ‘ऑपरेशन फ्लॅश आऊट’ मोहीम हाती घेतली आहे. या मोहिमेतर्गत तात्काळ कारवाई करण्याचे आदेश त्यांनी दिले होते.
पोलीस निरीक्षक ओमकांत चिंचोलकर यांच्या मार्गदर्शनाखाली नांदेड ग्रामीणच्या गुन्हे शोध पथकाने गोपनीय माहितीच्या आधारे सिडको परिसरात सापळा रचला. संशयाच्या आधारे कावेरी उर्फ विकास मोरे (वय २५ वर्ष, रा. आंबोली, ता. नायगाव, जि. नांदेड, ह.मु. सिडको नांदेड) या महिला आरोपीला अवघ्या दोन तासांत ताब्यात घेतले. पोलिसी खाक्या दाखवताच तिने अंध दाम्पत्याचे दागिने चोरल्याची कबुली दिली. तिच्याकडून चोरीला गेलेले सोन्याचे मंगळसूत्र हस्तगत करण्यात आले.
१२ तासांत दोषारोपपत्र आणि संवेदनशीलता
फिर्यादी आणि त्यांचे पती दोघेही अंध असल्याने नांदेड ग्रामीण पोलिसांनी या प्रकरणाकडे अत्यंत संवेदनशीलतेने पाहिले. जप्त केलेले सोने कायदेशीर प्रक्रिया पूर्ण करून तात्काळ फिर्यादी महिलेला परत करण्यात आले. इतकेच नव्हे तर, तपास अधिकाऱ्यांनी अत्यंत जलद गतीने तपास पूर्ण करून, गुन्हा दाखल झाल्यापासून अवघ्या १२ तासांच्या आत महिला आरोपीविरुद्ध न्यायालयात दोषारोपपत्र दाखल केले.
या पथकाने केली कामगिरी
ही धडक कारवाई पोलीस अधीक्षक मा. श्री. अबिनाश कुमार, अपर पोलीस अधीक्षक मा. श्रीमती अर्चना पाटील (भोकर), अपर पोलीस अधीक्षक मा. श्री. सुरज गुरव, आणि उपविभागीय पोलीस अधिकारी (इतवारा) मा. श्री. प्रशांत शिंदे यांच्या मार्गदर्शनाखाली पार पडली.
तसेच, प्रत्यक्ष कारवाईत पोलीस निरीक्षक ओमकांत चिंचोलकर, पोलीस उपनिरीक्षक ज्ञानेश्वर मतवाड, सपोउपनि रामकिशन मोरे, पोलीस अंमलदार अर्जुन मुडे, संतोष पवार, असीफ अली, गवेंद्र सिरमलवार आणि विष्णू कल्याणकर यांनी महत्त्वाची भूमिका बजावली. या उल्लेखनीय आणि जलद कामगिरीबद्दल पोलीस अधीक्षक साहेबांनी संपूर्ण पथकाचे विशेष कौतुक व अभिनंदन केले आहे.
