नांदेड १ जून प्रतिनिधी
नांदेड परिक्षेत्रातील गुन्हेगारी आणि अवैध व्यवसायांचे कंबरडे मोडण्यासाठी पोलीस यंत्रणेने अत्यंत आक्रमक पाऊल उचलले आहे. पोलीस उप महानिरीक्षक श्री. शहाजी उमाप यांच्या मार्गदर्शनाखाली संपूर्ण परिक्षेत्रात चालवण्यात आलेल्या विशेष मोहिमेदरम्यान, गेल्या महिनाभरात तब्बल १,७३९ गुन्हे दाखल करण्यात आले असून २५ कोटींपेक्षा अधिक किमतीचा मुद्देमाल हस्तगत करण्यात आला आहे. पोलिसांच्या या धडक कारवाईमुळे अवैध धंदेवाल्यांचे धाबे दणाणले आहेत.

महिनाभराच्या कारवाईचा थरारक आकडा

१ मे ते ३१ मे २०२६ या कालावधीत नांदेड परिक्षेत्रात गुटखा, मटका, जुगार, अवैध दारू विक्री, अवैध शस्त्रे आणि इतर बेकायदेशीर व्यवसायांविरोधात व्यापक मोहीम उघडण्यात आली होती. या मोहिमेत एकूण २,४१२ इसमांविरुद्ध गुन्हे दाखल करून पोलिसांनी कायद्याचा बडगा उगारला. निष्पन्न झालेल्या आरोपींकडून एकूण २५,०१,२६,२३७ रुपये किमतीचा अवाढव्य मुद्देमाल जप्त करण्यात आला आहे.
विविध कलमांनुसार झालेली कारवाई खालीलप्रमाणे:

• गुटखा व्यावसायिक: भारतीय न्याय संहितेच्या कलम १२३ अंतर्गत ३२ गुन्हे.
• मटका/जुगार: महाराष्ट्र जुगार कायद्यांतर्गत ३५० गुन्हे.
• अवैध दारू: महाराष्ट्र दारूबंदी कायद्यान्वये ९८८ गुन्हे.
• अवैध शस्त्रे: शस्त्र अधिनियमान्वये ८७ गुन्हे.
• इतर गुन्हे: इतर अधिनियमाखाली २८२ कारवाया.

चारही जिल्ह्यांमधील कारवाईचा संक्षिप्त गोषवारा (तक्ता):

जिल्हा गुटखा (गुन्हे/मु मुद्देमाल) मटका/जुगार (गुन्हे/मुद्देमाल) दारू (गुन्हे/मुद्देमाल) शस्त्र अधिनियम (गुन्हे/मुद्देमाल) इतर केसेस (गुन्हे/मुद्देमाल) नांदेड १२ गुन्हे (₹७७,६५,२८२) ११४ गुन्हे (₹५२,९९,७१०) ३२६ गुन्हे (₹३०,८३,८४८) ५९ गुन्हे (₹५९,४९,३००) ६१ गुन्हे (₹११,१५,०५,१०३) परभणी ९ गुन्हे (₹११,१२,७३९) ६६ गुन्हे (₹१८,५७,०३६) १२३ गुन्हे (₹१४,३३,०००) १२ गुन्हे (₹३,१०,८००) ५० गुन्हे (₹५,३९,५३,७४२) हिंगोली ५ गुन्हे (₹१७,५१,७८०) ५३ गुन्हे (₹३,१२,०१०) २०९ गुन्हे (₹५,०८,०९५) ६ गुन्हे (₹७०,८००) ६४ गुन्हे (₹१,६८,५२,३७१) लातूर ६ गुन्हे (₹१५,००,९४०) ११७ गुन्हे (₹५५,६८,९०५) ३३० गुन्हे (₹२५,५२,४२०) १० गुन्हे (₹८,०००) १०७ गुन्हे (₹२,८७,३०,३५६) एकूण३२ गुन्हे (₹१,२१,३०,७४१)३५० गुन्हे (₹१,३०,३७,६६१)९८८ गुन्हे (₹७५,७७,३६३)८७ गुन्हे (₹६३,३८,९००)२८२ गुन्हे (₹२१,१०,४१,५७२)

१ जूनपासून गुटखा व अंमली पदार्थ विरोधी ‘विशेष मोहीम’

मे महिन्यातील यशस्वी कारवाईनंतर आता पोलीस प्रशासन आणखी सज्ज झाले आहे. संपूर्ण जून महिन्यात परिक्षेत्रातील चारही जिल्ह्यांमध्ये (नांदेड, परभणी, हिंगोली, लातूर) अवैध गुटखा विक्री, वाहतूक, तसेच अंमली पदार्थांचे उत्पादन, साठवणूक आणि तस्करीविरुद्ध अत्यंत प्रभावी मोहीम राबवली जाणार आहे. संबंधित पोलीस अधिकारी व अंमलदारांना कडक कारवाईचे आदेश देण्यात आले आहेत.

दहा ते वीस वर्षांच्या कारावासाची तरतूद!
गुटख्याविरुद्धच्या कारवाईसाठी दहा वर्षांपर्यंत आणि अंमली पदार्थांविरुद्धच्या गुन्ह्यांसाठी वीस वर्षांपर्यंतच्या कठोर कारावासाची शिक्षा होऊ शकते. त्यामुळे नागरिकांनी आणि व्यावसायिकांनी अशा अवैध धंद्यांपासून दूर राहावे, असे आवाहन पोलिसांतर्फे करण्यात आले आहे.

नागरिकांसाठी ‘खबर’ हेल्पलाइन सुरू!

अवैध व्यवसायांची माहिती थेट पोलिसांपर्यंत पोहोचवण्यासाठी पोलीस उप महानिरीक्षक कार्यालयाने ९१ ५० १०० १०० (91 50 100 100) हा मोबाईल क्रमांक असलेली ‘खबर’ हेल्पलाइन सुरू केली आहे. नागरिकांनी आपल्या भागातील कोणत्याही अवैध कृत्याची माहिती या क्रमांकावर फोन करून अथवा व्हॉट्सॲप मेसेजद्वारे पाठवावी, माहिती देणाऱ्याचे नाव गोपनीय ठेवले जाईल, असे आश्वासन पोलीस उप महानिरीक्षक श्री. शहाजी उमाप यांनी दिले आहे.
– विशेष प्रतिनिधी, माधव वाघमारे