नांदेड  २० जुलै (प्रतिनिधी माधव वाघमारे)
महाविद्यालयीन विद्यार्थ्याचे अपहरण करून त्याला बेदम मारहाण करत रोख रक्कम व ऑनलाईन (PhonePe) व्यवहाराद्वारे पैसे लुटणाऱ्या टोळीचा भाग्यानगर गुन्हे शोध पथकाने अवघ्या काही तासांत पर्दाफाश केला आहे. या धडक कारवाईत एका सराईत आरोपीसह तीन विधिसंघर्षग्रस्त बालकांना ताब्यात घेण्यात आले असून, गुन्ह्यातील १०० टक्के मुद्देमाल जप्त करण्यात आला आहे.

घटनेची पार्श्वभूमी व तक्रार

मिळालेल्या माहितीनुसार, १८ जुलै २०२६ रोजी दुपारी १२.३० ते २.३० वाजेच्या दरम्यान यशवंत महाविद्यालय, नांदेड परिसरातून एका अल्पवयीन विद्यार्थ्याला आरोपींनी जबरदस्तीने मोटरसायकलवर बसवून निर्जनस्थळी नेले. तेथे त्याला मारहाण करून त्याच्याकडील रोख रक्कम हिसकावून घेतली आणि मोबाईलद्वारे PhonePe वरून जबरदस्तीने पैसे ट्रान्सफर करून घेतले. या प्रकरणी पीडित विद्यार्थ्याने १९ जुलै २०२६ रोजी भाग्यनगर पोलीस ठाण्यात तक्रार नोंदवली. त्यावरून गु.र.नं. ३८५/२०२६, कलम ३०९(६), १३७(२), ३(५) भा.न्या.सं. अन्वये गुन्हा दाखल करण्यात आला.

तपास आणि धडक कारवाई

घटनेचे गांभीर्य लक्षात घेऊन भाग्यनगर पोलीस ठाण्याचे  अधिकारी श्री. संतोष तांबे यांच्या नेतृत्वात गुन्हे शोध पथकाचे पोउपनि/ विनोद देशमुख व त्यांच्या पथकाने तत्काळ तपास सुरू केला. परिसरातील CCTV फुटेज, मोटरसायकल क्रमांक आणि तांत्रिक विश्लेषणाच्या आधारे पोलिसांनी आरोपींचा माग काढला.
अवघ्या काही तासांत चारही आरोपींना ताब्यात घेण्यात आले. सखोल चौकशीदरम्यान आरोपींनी गुन्ह्याची कबुली दिली. पोलिसांनी अथर्व अनिल गायकवाड (वय १९ वर्षे, रा. आंबेडकर नगर, नांदेड) याच्यासह तीन विधिसंघर्षग्रस्त बालकांना ताब्यात घेतले आहे.

१००% मुद्देमाल जप्त

पोलीस पथकाने आरोपींकडून रोख रक्कम, PhonePe द्वारे लुटलेली रक्कम, गुन्ह्यात वापरलेले ३ मोबाईल फोन आणि एक मोटरसायकल असा एकूण ₹१,३६,६३३/- (एक लाख छत्तीस हजार सहाशे तेहेतीस रुपये) किमतीचा १००% मुद्देमाल जप्त केला आहे. पुढील तपास पोउपनि/ विनोद देशमुख करत आहेत.

तपास पथक

ही उल्लेखनिनीय कारवाई पोलीस अधीक्षक श्री. निलाभ रोहन आणि अपर पोलीस अधीक्षक श्री. सूरज गुरव यांच्या मार्गदर्शनाखाली:

• पोलीस निरीक्षक: श्री. संतोष तांबे, श्री. महेश माळी (गुन्हे)
• पोलीस उपनिरीक्षक: विनोद देशमुख
• पोलीस उप निरीक्षक नरेश वाडेवाले, विशाल माळवे, विष्णुकांत मुंडे, सुधारकर मलदोडे, राजीव घुले, नागनाथ चापके, राहुल लाठकर, आदनान पठाण व अंकुश कांबळे यांनी पार पाडली.

पोलीसांचे आवाहन:
नांदेड जिल्हा पोलीसांनी नागरिकांना आवाहन केले आहे की, कोणतीही संशयास्पद हालचाल, जबरिने पैसे उकळण्याचा प्रयत्न, अपहरण, मारहाण किंवा तत्सम घटना घडल्यास तात्काळ ११२ आपत्कालीन सेवा अथवा जवळच्या पोलीस ठाण्याशी संपर्क साधावा. नागरिकांच्या सतर्कतेमुळे गुन्ह्यांना प्रतिबंध घालण्यास व आरोपींना त्वरित अटक करण्यास मदत होते.