नांदेड / कंधार २० जुलै प्रतिनिधी
नांदेड जिल्ह्यामध्ये प्रतिबंधित गुटखा, सुगंधित पानमसाला आणि तंबाखूजन्य पदार्थांची अवैध विक्री व वाहतूक करणाऱ्यांविरुद्ध विशेष मोहीम तीव्र करण्यात आली आहे. या मोहिमेअंतर्गत कंधार पोलीस ठाण्याच्या पथकाने डिग्रस (बु.) रोड परिसरात मोठी कारवाई करत ₹८,८८,६४०/- किमतीचा मुद्देमाल जप्त केला आहे. या प्रकरणी एका आरोपीस ताब्यात घेण्यात आले असून कंधार पोलीस ठाण्यात गुन्हा दाखल करण्यात आला आहे.
नाकेबंदी करून धाडसी पाठलाग
मिळालेल्या माहितीनुसार, १९ जुलै २०२६ रोजी कंधार पोलीस ठाण्याच्या अधिकारी व कर्मचाऱ्यांना गोपनीय बातमीदारांमार्फत माहिती मिळाली होती की, एक इसम चारचाकी वाहनातून मोठ्या प्रमाणात प्रतिबंधित गुटखा व पानमसाल्याची डिग्रस (बु.) मार्गे वाहतूक करत आहे.
मिळालेल्या माहितीच्या आधारे पोलिसांनी तात्काळ डिग्रस (बु.) रोड परिसरात सापळा रचून वाहनांची तपासणी सुरू केली. यादरम्यान एक टोयोटा इटिओस कार (क्र. MH-48-BH-0634) संशयास्पद रीतीने येताना दिसली. पोलिसांनी वाहन थांबविण्याचा इशारा केला असता, चालकाने कार भरधाव वेगाने पळवून नेण्याचा प्रयत्न केला. मात्र, पोलिसांनी तत्परता दाखवत वाहनाचा पाठलाग करून ते अडवले आणि चालकाला ताब्यात घेतले.
जप्त करण्यात आलेला मुद्देमाल
पंचांसमक्ष वाहनाची सखोल झडती घेतली असता वाहनामध्ये खालीलप्रमाणे मुद्देमाल आढळून आला:
- विमल पानमसाला (प्रतिबंधित गुटखा): ₹३,०५,७६०/-
- तंबाखू: ₹१,३१,०४०/-
- रजनीगंधा सुगंधित पानमसाला: ₹२५,९२०/-
- रजनीगंधा पानमसाला: ₹२५,९२०/-
- टोयोटा इटिओस कार (MH-48-BH-0634): ₹४,००,०००/-
- एकूण जप्त मुद्देमाल: ₹८,८८,६४०/-
दोन आरोपींवर गुन्हा दाखल
या प्रकरणी अमर संजय कांबळे (वय २६ वर्षे, रा. डिग्रस बु., ता. कंधार, जि. नांदेड) याला ताब्यात घेण्यात आले असून, त्याचा साथीदार बाळू वडजे (रा. डिग्रस बु., ता. कंधार, जि. नांदेड) या दोघांविरुद्ध कंधार पोलीस ठाण्यात गुन्हा रजि. क्र. 269/2026 अन्वये भारतीय न्याय संहिता (BNS) कलम १२३, ३(५) तसेच अन्न सुरक्षा व मानके अधिनियम, २००६ च्या कलम ५९ नुसार गुन्हा दाखल करण्यात आला आहे. सदर प्रकरणाचा पुढील तपास कंधार पोलीस करत आहेत.
पोलीस पथकाचे कौतुक
सदरची उल्लेखनीय कामगिरी मा. डॉ. नीलाभ रोहन (पोलीस अधीक्षक, नांदेड) यांच्या मार्गदर्शनाखाली:
- पोनि/ घोडके
- सपोनि/ कोकाटे
- पोलीस अंमलदार: प्रकाश टाकरस, एकनाथ घुगे, कामवाड (सर्व नेमणूक कंधार पोलीस ठाणे) यांनी पार पाडली.
बातमी संकलन: प्रतिनिधी माधव वाघमारे
