नांदेड २१ जुलै मंगळवार ( प्रतिनिधी)
आषाढी एकादशीचे औचित्य साधून येत्या २५ जुलै रोजी (शनिवार) नांदेड शहरात ‘भव्य माऊली दिंडी – प्रती पंढरपूर’ चे भव्य आयोजन करण्यात आले आहे. या माऊली दिंडीची संपूर्ण तयारी पूर्ण झाली असून, ही माहिती दिंडीचे मुख्य संयोजक डॉ. रमेश नारलावार यांनी पत्रकार परिषदेत दिली.
शोभायात्रेची वैशिष्ट्ये आणि आकर्षणे
या भव्य दिंडीमध्ये विठ्ठल-रुखमाईचा नयनरम्य देखावा मुख्य आकर्षण असणार आहे. याशिवाय टाळकरी, वीणेकरी, मृदंगधारी आणि पारंपरिक लेझिम पथक यांचा सहभाग असेल. तसेच शौर्य पथकाद्वारे झाशीची राणी आणि लहान मुलांचे शौर्य प्रात्यक्षिके सादर केली जाणार आहेत.
दिंडीचा मार्ग आणि वेळ
ही शोभायात्रा शनिवार २५ जुलै रोजी दुपारी २.०० वाजता विठ्ठल रुखमाई मंदिर, संत नामदेव मंदिर (गायत्री मंदिराजवळ, नवीन पुलाखाली) येथून निघेल. तेथून मोंढा येथील टॉवरमार्गे कलामंदिर आणि स्वामी समर्थ मंदिरापर्यंत पोहोचेल. या ठिकाणी महाप्रसादाने कार्यक्रमाची सांगता होईल.
आयोजनाचे मुख्य उद्दिष्ट
पत्रकार परिषदेत बोलताना डॉ. नारलावार यांनी सांगितले की, या दिंडीचे दोन प्रमुख उद्देश आहेत —
१. भव्य सांस्कृतिक उपक्रमाचे आयोजन करणे.
२. हिंदू जनजागरण व हिंदू एकत्रीकरण करणे (ज्यामध्ये जैन, बौद्ध, शीख व इतर सर्व घटकांचा समावेश आहे), ज्यामुळे समाजातील अन्यायाचा प्रतिकार करता येईल.
खरी हिंदुत्व म्हणजे ‘माणुसकी जपणे’ आणि इतरांसाठी ‘त्याग करणे’ हेच आहे. या दिंडीच्या माध्यमातून विविध सामाजिक संदेश आणि स्लोगन लोकांपर्यंत पोहोचवले जाणार आहेत.
सहभागासाठी आवाहन
या शोभायात्रेत विविध संघटना जसे की, डॉक्टर संघटना, व्यापारी संघटना, विविध समाज संघटना, भजनी मंडळ, महिला मंडळ, राजस्थानी महिला मंडळ, आर्य वैश्य महिला मंडळ आणि नानकसाई फाउंडेशन (अध्यक्ष श्री पंढरीनाथ बोकारे) यांनी उत्स्फूर्त सहभाग नोंदवण्याचे आवाहन केले आहे.
जे पंढरपूरला जाऊ शकत नाहीत त्यांना एक वारीचा अनुभव व आनंद देण्याचा अल्पसा प्रयत्न.
महिला आघाडी
सौ संध्याताई छपरवाल
प्रोफ अंजली चौधरी
प्रो वंदना पाटील तसेच डॉ. रमेश नारलावार, श्री. शंकरराव सिंगेवार, गणेश ठाकूर, मोहन पाटील, डॉ. तळणकर, डॉ. रायेवार, गणेश गादेवार, मधुकर मोतेवार, अनिल पांचटवार, ॲड. गजानन पिंपरखेडे, महिला आघाडीकडून सौ. प्राची चौधरी, कु. ज्योती पाटील व माला शर्मा यांनी नांदेडमधील सर्व भाविक भक्त आणि नागरिकांनी मोठ्या संख्येने या सोहळ्यात सहभागी व्हावे, असे आवाहन केले आहे.
