महात्मा फुले हायस्कूलमध्ये वाहतूक सुरक्षा जनजागृती कार्यक्रम उत्साहात

नांदेड २९ जुलै ( प्रतिनिधी – माधव वाघमारे)
रस्ते अपघातांचे वाढते प्रमाण रोखण्यासाठी आणि विद्यार्थ्यांमध्ये वाहतूक नियमांविषयी जागृती निर्माण करण्यासाठी नांदेड येथील महात्मा फुले हायस्कूल येथे मंगळवारी (दि. २८ जुलै) विशेष वाहतूक सुरक्षा जनजागृती कार्यक्रम उत्साहात पार पडला. “वाहतूक नियमांचे तंतोतंत पालन करणे ही काळाची गरज असून विद्यार्थ्यांनी सुरक्षित वाहतुकीचे नियम आत्मसात करून जबाबदार नागरिक बनावे,” असे आवाहन याप्रसंगी नांदेडचे जिल्हाधिकारी राहुल कर्डिले यांनी केले.
कार्यक्रमास ‘सेफ इंडिया रोड्स’ व ‘अँटीकरप्शन टीम इंडिया’चे डायरेक्टर घनश्याम ओझा, वाहतूक शाखेचे पोलीस उपनिरीक्षक जासपाल सिंग कोर्टतीर्थवाले आणि पोलीस उपनिरीक्षक अजय साखळे यांची प्रमुख उपस्थिती होती.
विद्यार्थ्यांच्या सर्जनशीलतेचे जिल्हाधिकाऱ्यांकडून कौतुक
या कार्यक्रमादरम्यान जिल्हाधिकारी राहुल कर्डिले यांनी विद्यालयातील विज्ञान विभाग, क्रीडा विभाग आणि ‘अटल टिंकरिंग लॅब’मधील नाविन्यपूर्ण उपक्रमांची पाहणी केली. शाळेतील शिस्तबद्ध वातावरण, अभ्यासासोबतच इतर क्षेत्रांतील विद्यार्थ्यांचा उल्लेखनीय सहभाग आणि त्यांची सर्जनशीलता पाहून त्यांनी विशेष समाधान व्यक्त केले व विद्यार्थ्यांच्या गुणवत्तेचे कौतुक केले.
डॉ. राम वाघमारे यांच्याकडून पुस्तक भेट
कार्यक्रमादरम्यान शाळेचे सहशिक्षक, मराठी अभ्यास मंडळाचे सदस्य तथा साहित्यिक डॉ. राम वाघमारे यांनी जिल्हाधिकारी राहुल कर्डिले यांचा सत्कार करून स्वतः लिखित पाच पुस्तकांचा संच भेट दिला. जिल्हाधिकाऱ्यांनी या साहित्यकृतींची प्रशंसा करत डॉ. वाघमारे यांच्या साहित्यिक योगदानाबद्दल त्यांचे अभिनंदन केले.
याप्रसंगी उपमुख्याध्यापक डॉ. अण्णा गरड, पर्यवेक्षक एस. व्ही. जाधव, शिक्षकवृंद व मोठ्या संख्येने विद्यार्थी उपस्थित होते.