नांदेड नायगाव |१ फेब्रुवारी प्रतिनिधी
नायगाव येथील जिल्हा परिषद बांधकाम उपविभाग कार्यालयात कार्यरत असलेल्या सहाय्यक अभियंत्याने कार्यालयातच गळफास घेऊन आत्महत्या केल्याची धक्कादायक घटना शनिवारी (दि. ३१) दुपारी उघडकीस आली. या घटनेमुळे नायगाव शहरासह संपूर्ण परिसरात एकच खळबळ उडाली असून, मृत्यू आत्महत्या की घातपात याबाबत संशय व्यक्त केला जात आहे.
मृत सहाय्यक अभियंत्याचे नाव बोलोरे (मूळ रा. लांडोवाडी, ता. लोहा) असे असून, ते सध्या नायगाव येथे प्रतिनियुक्तीवर कार्यरत होते. मिळालेल्या माहितीनुसार, घटनेच्या वेळी कार्यालयात कर्मचारी उपस्थित नसल्याने ही बाब काही वेळानंतर लक्षात आली. कार्यालयाबाहेर एक बेवारस दुचाकी आढळून आल्यानेही या प्रकरणातील संशय अधिक बळावला आहे.
खिडकीतून दिसले मृतदेह, नागरिकांनी दिली माहिती
शनिवारी सुटी असल्याने जिल्हा परिषद कार्यालय बंद होते. शुक्रवारी सायंकाळी सेवक कुलूप लावून गेल्यानंतर ही घटना घडली असावी, असा प्राथमिक अंदाज पोलिसांनी व्यक्त केला आहे. दरम्यान, दुचाकीवरून जाणाऱ्या नागरिकांना कार्यालयाच्या खिडकीतून मृतदेह लोंबकळताना दिसून आला. त्यांनी तत्काळ पोलिसांना माहिती दिल्यानंतर ही बाब उघडकीस आली.
पोलिसांचा तपास सुरू
घटनेची माहिती मिळताच सहाय्यक पोलीस निरीक्षक व जिल्हा परिषद उपअभियंता वाकडे यांनी सहकाऱ्यांसह घटनास्थळी धाव घेतली. पंचनामा करून मृतदेह ताब्यात घेण्यात आला असून, पुढील तपास सुरू आहे. मृत अभियंत्याची काही महिन्यांपूर्वीच देगलूर येथे पदोन्नती झाली होती, तरीही ते नायगाव येथे कार्यरत होते.
संशयाची साखळी कायम
ही घटना आत्महत्या असल्याचा प्राथमिक अंदाज असला, तरी काही बाबी संशयास्पद असल्याने घातपाताचा संशयही व्यक्त केला जात आहे. त्यामुळे पोलीस सर्व बाजूंनी तपास करत असून, मृत्यूचे नेमके कारण शवविच्छेदन अहवालानंतर स्पष्ट होणार आहे.
या दुर्दैवी घटनेमुळे नायगाव शहरात शोककळा पसरली असून, जिल्हा परिषद कर्मचाऱ्यांमध्ये हळहळ व्यक्त केली जात आहे.
