नांदेड ८ जून ( प्रतिनिधी, माधव वाघमारे)
नांदेड परिक्षेत्राचे पोलीस उपमहानिरीक्षक (DIG) श्री. शहाजी उमाप यांच्या मार्गदर्शनाखाली संपूर्ण परिक्षेत्रात गुटखा व अमली पदार्थ विरोधी मोहिमेचा धडाका सुरू झाला आहे. १ ते ३० जून २०२६ या कालावधीत राबवल्या जाणाऱ्या या विशेष मोहिमेच्या पहिल्याच आठवड्यात (१ ते ७ जून) पोलिसांनी गुटखा विक्रेते, साठेबाज आणि वाहतूक करणाऱ्यांवर तीव्र कारवाई केली आहे. या धडक कारवाईत परिक्षेत्रातील तब्बल २ हजार ७०२ पानटपऱ्यांची तपासणी करण्यात आली असून, ३० गुन्हे दाखल करत ६७ लाख २ हजार ६७१ रुपयांचा मुद्देमाल हस्तगत करण्यात आला आहे.
नवीन कायद्यांतर्गत (BNS 123) गुन्हे दाखल
गुटख्याची बेकायदेशीर विक्री, साठवणूक आणि वाहतूक करणाऱ्यांविरुद्ध नव्याने लागू झालेल्या भारतीय न्याय संहितेच्या (BNS) कलम १२३ अंतर्गत कडक कारवाई करण्यात येत आहे. पहिल्या आठवड्यात परिक्षेत्रातील नांदेड, परभणी, हिंगोली आणि लातूर या चारही जिल्ह्यांत मिळून एकूण ४८ आरोपींना ताब्यात घेण्यात आले आहे.
परिक्षेत्रातील जिल्हावार कारवाईचा संक्षिप्त आढावा :
जिल्हा तपासलेल्या पानटपऱ्या दाखल गुन्हे (BNS 123) जप्त मुद्देमालाची किंमत (रु.) अटक आरोपी संख्या नांदेड ५३० ११ २५,२१,७४१ १२ परभणी ८३९ ०९ १२,६४,०४३ १४ हिंगोली ७२४ ०३ १,६९,५३१ ०४ लातूर ६०९ ०७ २७,४७,३५६ १८ एकूण२,७०२३०६७,०२,६७१४८
पान टपऱ्यांची व्यापक तपासणी आणि अमली पदार्थांवर नजर
गुटखा व इतर प्रतिबंधित तंबाखूजन्य पदार्थांची थेट टपऱ्यांवरून होणारी विक्री पूर्णपणे रोखण्यासाठी पोलिसांनी ही व्यापक मोहीम हाती घेतली आहे. याअंतर्गत केवळ गुटखाच नव्हे, तर अमली पदार्थांच्या साठवणुकीची संभाव्य ठिकाणे आणि गोदामांचीही कसून तपासणी केली जात आहे. यामुळे अवैध धंदे करणाऱ्यांचे धाबे दणाणले आहेत.
‘खबर’ हेल्पलाइनला नागरिकांचा उदंड प्रतिसाद
अवैध व्यवसायांची माहिती थेट पोलिसांपर्यंत पोहोचवण्यासाठी पोलीस उपमहानिरीक्षक कार्यालयाने ९१ ५० १०० १०० (91 50 100 100) हा मोबाईल क्रमांक असलेली ‘खबर’ हेल्पलाइन सुरू केली आहे. या हेल्पलाइनला नागरिकांचा मोठा प्रतिसाद मिळत असून, यावरून मिळणाऱ्या अचूक माहितीच्या आधारे पोलीस तात्काळ धाडी टाकत आहेत.
नागरिकांना आवाहन: > “आपल्या भागात कुठेही गुटखा, अमली पदार्थ किंवा इतर अवैध व्यवसाय सुरू असल्यास नागरिकांनी तात्काळ ९१ ५० १०० १०० या क्रमांकावर फोन करून अथवा व्हॉट्सॲपवर मेसेजद्वारे माहिती द्यावी. माहिती देणाऱ्याचे नाव गुप्त ठेवले जाईल. नागरिकांनी आपल्या भागातील अवैध व्यवसायांना आळा घालण्यासाठी पोलिसांना सक्रिय सहकार्य करावे.”
— श्री. शहाजी उमाप (पोलीस उपमहानिरीक्षक, नांदेड परिक्षेत्र)
