पिंपरी-चिंचवड १६ ऑगस्ट
स्वातंत्र्यदिनाचे औचित्य साधून पिंपरी-चिंचवड शहरात युवकांच्या उत्साहाने आणि एकजुटीने एक वेगळाच माहौल निर्माण झाला. पिंपरी-चिंचवड महानगरपालिका (PCMC) आणि लाईटहाऊस कम्युनिटीज् फाउंडेशन (LCF) यांच्या संयुक्त विद्यमाने चालवल्या जाणाऱ्या १० लाईटहाऊस कौशल्य विकास केंद्रांच्या वतीने स्वातंत्र्यदिन अत्यंत उत्साहात साजरा करण्यात आला.
स्वातंत्र्यदिनाचे औचित्य साधून शहरातील पिंपरी, चिंचवड, निगडी, आकुर्डी, नेहरूनगर, भोसरी, किवळे, बोऱ्हाडेवाडी, चिखली आणि दापोडी या भागांमध्ये एकाच वेळी भव्य जनजागृती रॅलीचे आयोजन करण्यात आले होते. या रॅलीमध्ये सुमारे ४०० हून अधिक युवकांनी उत्स्फूर्त सहभाग नोंदवला.
ध्वजारोहणाचा कार्यक्रम पार पडल्यानंतर लगेचच या रॅलीला सुरुवात झाली. एकाच गणवेशात खांद्याला खांदा लावून चालणाऱ्या युवकांच्या शिस्तबद्ध सहभागाने उपस्थितांचे लक्ष वेधून घेतले. “ओळख स्वतःची, जिद्द यशाची” अशा ऊर्जादायी घोषणांनी संपूर्ण परिसर दुमदुमून गेला होता. या रॅलीच्या माध्यमातून कौशल्यविकास, रोजगार, युवा सक्षमीकरण आणि आर्थिक स्वावलंबनाचा महत्त्वपूर्ण संदेश नागरिकांपर्यंत पोहोचवण्यात आला.
रॅली दरम्यान लाईटहाऊसचे कर्मचारी, विद्यमान विद्यार्थी तसेच माजी विद्यार्थ्यांनी स्थानिक नागरिकांना उपलब्ध असणाऱ्या विविध कौशल्यविकास प्रशिक्षण व रोजगाराच्या संधींविषयी सविस्तर माहिती दिली. परिसरातील नागरिकांनीही या उपक्रमाचे स्वागत करत युवकांना मोठा प्रतिसाद दिला.
पिंपरी चिंचवड महापालिका आणि लाईटहाऊस कम्युनिटीज् फाउंडेशन यांच्या संयुक्त ‘कौशल्यम’ उपक्रमाच्या माध्यमातून आजवर शहरातील १३,००० पेक्षा जास्त युवकांना मार्गदर्शन आणि प्रशिक्षण देण्यात आले आहे. यापैकी ६,४०० हून अधिक तरुणांना विविध रोजगार व स्वयंरोजगाराच्या संधींशी यशस्वीरीत्या जोडण्यात आले आहे.
केवळ स्वातंत्र्याचा उत्सव साजरा न करता, युवकांनी स्वतःमधील सुप्त क्षमता ओळखावी, आधुनिक कौशल्ये आत्मसात करावीत आणि आत्मविश्वासाने स्वावलंबी भवितव्य घडवावे, हा सकारात्मक संदेश या रॅलीच्या माध्यमातून देण्यात आला.
प्रतिनिधी: माधव वाघमारे
