मुखेड तालुक्यातील हिप्परगा येथे शेतात बेकायदेशीर गांजाची लागवड तब्बल ५ किलो गांजासह ६७ वर्षीय आरोपी जेरबंद

नांदेड २३ मे

( प्रतिनिधी, माधव वाघमारे): नांदेड जिल्ह्याला अमली पदार्थांच्या विळख्यातून मुक्त करण्यासाठी पोलीस प्रशासनाने कंबर कसली आहे. पोलीस अधीक्षक अबिनाश कुमार यांच्या मार्गदर्शनाखाली राबविण्यात येत असलेल्या ‘ऑपरेशन क्रॅकडाऊन’ अंतर्गत स्थानिक गुन्हे शाखेने (LCB) मुखेड तालुक्यात एक मोठी आणि धडक कारवाई केली आहे. मुखेड पोलीस ठाण्याच्या हद्दीतील मौजे हिप्परगा (दे) येथील एका शेतात छुप्या पद्धतीने लावलेले ५ किलो १९० ग्रॅम वजनाचे गांजाचे झाड जप्त करण्यात आले असून, या प्रकरणी एका ६७ वर्षीय वृद्ध आरोपीला अटक करण्यात आली आहे. जप्त करण्यात आलेल्या गांजाची किंमत सुमारे १,०३,८००/- रुपये एवढी आहे.

गोपनीय माहितीच्या आधारे टाकला छापा

जिल्ह्यात अवैध अमली पदार्थ विक्री करणाऱ्यांवर कठोर कारवाई करण्याचे आदेश पोलीस अधीक्षक अबिनाश कुमार यांनी स्थानिक गुन्हे शाखेचे पोलीस निरीक्षक अतुल भोसले यांना दिले होते. दरम्यान, स्था.गु.शा. नांदेड येथील ग्रे.पोउपनि बळीराम दासरे व त्यांच्या पथकाला एक अत्यंत विश्वसनीय आणि गोपनीय माहिती मिळाली. मुखेड तालुक्यातील हिप्परगा (दे) शिवारातील गोविंद केरबा शिकारे याने आपल्या शेतात एन.डी.पी.एस. अॅक्ट (NDPS Act) च्या तरतुदींचे उल्लंघन करून, चोरटी विक्री करण्याच्या उद्देशाने गांजाची लागवड केली आहे, अशी माहिती पोलिसांना मिळाली होती.
मिळालेल्या माहितीची खातरजमा करून, वरिष्ठ अधिकाऱ्यांच्या परवानगीने स्था.गु.शा. च्या पथकाने शासकीय पंचांसह २२ मे २०२६ रोजी हिप्परगा येथील संबंधित शेतात अचानक छापा टाकला.

शेतातून १ लाख रुपयांचा गांजा जप्त, आरोपी ताब्यात

पोलिसांनी शेताची कसून पाहणी केली असता, तेथे हिरव्या रंगाची पाने आणि बोंडे असलेले गांजाचे एक मोठे झाड आढळून आले. पोलिसांनी तात्काळ कारवाई करत ५ किलो १९० ग्रॅम वजनाचा हा अवैध अंमली पदार्थ जप्त केला, ज्याची बाजारपेठेत किंमत १,०३,८००/- रुपये आहे. या प्रकरणी पोलिसांनी शेतमालक गोविंद केरबा शिकारे (वय ६७ वर्षे, रा. हिप्परगा (दे), ता. मुखेड, जि. नांदेड) याला जागीच ताब्यात घेतले. या प्रकरणी मुखेड पोलीस ठाण्यात गुन्हा रजि. नं. १३९/२०२६ नुसार कलम ८ (क), २०(b)II, ब एन.डी.पी.एस. अॅक्ट १९८५ अन्वये गुन्हा दाखल करण्यात आला असून, पुढील तपास सुरू आहे.

या अधिकाऱ्यांच्या मार्गदर्शनाखाली झाली कामगिरी

ही धडक कारवाई नांदेडचे पोलीस अधीक्षक अबिनाश कुमार, अपर पोलीस अधीक्षक (भोकर) श्रीमती अर्चना पाटील, आणि अपर पोलीस अधीक्षक (नांदेड) सुरज गुरव यांच्या थेट मार्गदर्शनाखाली करण्यात आली.
कारवाईत सहभागी पथक:

• श्री. अतुल भोसले (पोलीस निरीक्षक, स्थानिक गुन्हे शाखा, नांदेड)
• श्री. सूर्यमोहन बोलमवाड (पोलीस निरीक्षक, पो.स्टे. देगलूर)
• श्री. बळीराम दासरे (ग्रे.पोउपनि, स्था.गु.शा. नांदेड)
• श्री. माधव केंद्रे (ग्रे.पोउपनि, स्था.गु.शा. नांदेड)
• अंमलदार: पोहेकॉ. दिलीपकुमार चंचलवार, पोहेकॉ. देविदास चव्हाण, पोहेकॉ. रितेश कुलथे, पोकों. मोतीराम पवार, आणि चापोकों. सुधाकर देवकते.
  अमली पदार्थ तस्करांविरुद्ध केलेल्या या धडक आणि यशस्वी कामगिरीबद्दल पोलीस अधीक्षक अबिनाश कुमार यांनी स्थानिक गुन्हे शाखेच्या संपूर्ण पथकाचे विशेष कौतुक केले आहे. या कारवाईमुळे जिल्ह्यातील अवैध अमली पदार्थ विक्रेत्यांचे धाबे दणाणले आहेत.