- प्रतिनिधी: माधव वाघमारे
नांदेड २४ मे - नांदेड शहरातील चोऱ्या आणि शरीराविरुद्धच्या गुन्ह्यांना पूर्णपणे आळा घालण्यासाठी नांदेड पोलीस दलाने कंबर कसली आहे. पोलीस अधीक्षक मा. श्री. अविनाश कुमार यांच्या थेट मार्गदर्शनाखाली शहरात ‘ऑपरेशन फ्लश आऊट’ अंतर्गत धडक मोहीम हाती घेण्यात आली आहे. या मोहिमेचा भाग म्हणून काल रात्री (दिनांक २३ मे २०२३ च्या रात्री २३:०० वा. पासून ते २४ मे २०२६ च्या पहाटे ०३:०० वाजेपर्यंत) संपूर्ण नांदेड शहरात एकाच वेळी भव्य कोंबिंग ऑपरेशन राबवण्यात आले.
या धडक कारवाईमुळे सराईत गुन्हेगार, तडीपार आणि फरार आरोपींचे धाबे दणाणले असून, गेल्या ३९ दिवसांत तब्बल २१० पेक्षा जास्त आरोपींवर पोलिसी बडगा उगारण्यात आला आहे.
मध्यरात्री पोलिसांचा फौजफाटा रस्त्यावर
काल रात्री झालेल्या या विशेष मोहिमेसाठी शहरात मोठा बंदोबस्त तैनात करण्यात आला होता. यामध्ये अप्पर पोलीस अधीक्षक, उपविभागीय पोलीस अधिकारी (नांदेड शहर, भोकर, देगलूर, बिलोली उपविभाग), स्थानिक गुन्हे शाखा (LCB) चे पोलीस निरीक्षक, तसेच शहरातील सर्व पोलीस ठाण्यांचे प्रभारी अधिकारी, दुय्यम अधिकारी आणि राखीव पोलीस दलाचे (RCP) अमंलदार अशा एकूण ३७ अधिकारी आणि १४६ अंमलदारांनी प्रत्यक्ष रस्त्यावर उतरून ही कारवाई केली.
कोंबिंग ऑपरेशनची आकडेवारी (एका नजरेत)
तपासणी कारवाईचा प्रकार एकूण संख्या मोहिमेत सामील झालेले पोलीस अधिकारी ३७ मोहिमेत सामील झालेले पोलीस अंमलदार १४६ चेक करण्यात आलेले ५५, ५६ मधील तडीपार गुन्हेगार ३१ मपोका (MPDA) मधून सुटलेले व चेक केलेले गुन्हेगार २९ माला व शरीराविरुद्धचे चेक केलेले सराईत गुन्हेगार ५३ आर्म्स ॲक्ट (बेकायदेशीर शस्त्रे) अंतर्गत दाखल गुन्हे ०४ मपोका कलम १२२ अन्वये दाखल गुन्हे १३ अजामीनपात्र वॉरंट बजावणी (NBW) ११ जामीनपात्र वॉरंट बजावणी (BW) १८ समन्स बजावणी १२
बेकायदेशीर शस्त्रे आणि गुन्हेगारांवर गुन्हे दाखल
या रात्रीच्या मोहिमेदरम्यान मालमत्तेविरुद्ध व शरीराविरुद्ध गुन्हे करणारे, अवैध शस्त्र बाळगणारे, हद्दपार/तडीपार आरोपी, हिस्ट्रीशिटर आणि फरार आरोपींची कसून तपासणी करण्यात आली. यादरम्यान आर्म्स ॲक्ट कलम ४/२५ नुसार बेकायदेशीर शस्त्र बाळगल्याप्रकारणी ४ गुन्हे आणि मपोका कलम १२२ नुसार १३ गुन्हे दाखल करून अनेक आरोपींना ताब्यात घेण्यात आले आहे.
पोलीस ठाणे निहाय प्रमुख कारवाया:
- भाग्यनगर पोलीस ठाणे: आर्म्स ॲक्ट व मपोका कलम १२२ अन्वये कारवाया.
- वजिराबाद पोलीस ठाणे: आर्म्स ॲक्ट अंतर्गत कारवाई.
- नांदेड ग्रामीण पोलीस ठाणे: आर्म्स ॲक्ट आणि मपोका कलम १२२, १२४ अन्वये धडक कारवाया.
- शिवाजीनगर, विमानतळ व इतवारा पोलीस ठाणे: मपोका कलम १२२ नुसार रात्रीच्या वेळी संशयास्पद रित्या फिरणाऱ्यांवर गुन्हे दाखल.
तडीपार आदेशाचे उल्लंघन करणाऱ्यांना ठोकल्या बेड्या
पोलीस प्रशासनाने दिलेल्या माहितीनुसार, मपोका कलम ५५, ५६ आणि ५७ अन्वये नांदेड शहरातून हद्दपार करण्यात आलेल्या १३ आणि ३० (एकूण ४३) इसमांची कसून तपासणी करण्यात आली. यावेळी तडीपार आदेश झुगारून शहरातच वावरत असलेले १० सराईत गुन्हेगार पोलिसांच्या जाळ्यात सापडले. त्यांच्याविरुद्ध मपोका कलम १४२ नुसार तात्काळ गुन्हे दाखल करण्यात आले आहेत.
३९ दिवसांत १४० आरोपींवर कारवाई; ११४ गुन्हे दाखल
नांदेड पोलिसांनी गेल्या ३९ दिवसांत शहरात सातत्याने कोंबिंग ऑपरेशन आणि नाकाबंदीचे आयोजन केले आहे. या मोहिमेदरम्यान MPDA मधून सुटलेले आणि इतर सराईत गुन्हेगारांची झाडाझडती घेण्यात आली. या संपूर्ण कालावधीत आतापर्यंत एकूण १४० आरोपींविरुद्ध कडक कारवाई करण्यात आली असून, ११४ गुन्हे दाखल करण्यात आले आहेत. नागरिकांना आवाहन:
नांदेड शहरात शांतता व सुव्यवस्था अबाधित राखण्यासाठी आणि गुन्हेगारी मोडीत काढण्यासाठी पोलिसांची ही ‘Rounding up’ आणि तपासणी मोहीम अशीच सातत्याने सुरू राहणार आहे, अशी माहिती जनसंपर्क अधिकारी, पोलीस अधीक्षक कार्यालय, नांदेड यांच्या वतीने देण्यात आली आहे.
