नांदेड २७ मे प्रतिनिधी
नांदेड जिल्ह्यातील गुन्हेगारीला आळा घालण्यासाठी पोलीस अधीक्षक अविनाश कुमार यांच्या मार्गदर्शनाखाली सध्या ‘ऑपरेशन क्रॅकडाऊन’ तीव्र गतीने राबवले जात आहे. या मोहिमेत स्थानिक गुन्हे शाखेच्या (LCB) पथकाने एका धडक कारवाईत अवैध शस्त्र बाळगणाऱ्या दोन सराईत आरोपींना अटक केली आहे. त्यांच्या ताब्यातून एक लोखंडी गावठी पिस्तूल (अग्नीशस्त्र) आणि ४ जिवंत काडतुसे असा एकूण २७,००० रुपये किमतीचा मुद्देमाल जप्त करण्यात आला आहे.
एन.बी.एस. कॉलेज परिसरात पडला छापा
मिळालेल्या सविस्तर माहितीनुसार, २५ मे २०२६ रोजी स्थानिक गुन्हे शाखेचे सहाय्यक पोलीस निरीक्षक विठ्ठल घोगरे व त्यांचे पथक पेट्रोलिंगवर होते. यादरम्यान, एन.बी.एस. कॉलेजच्या बाजूला असलेल्या बंदाघाट रोडवर एक इसम बेकायदेशीररित्या गावठी पिस्तूल बाळगून उभा असल्याची गोपनीय माहिती पथकाला मिळाली.
माहिती मिळताच पोलिसांनी तात्काळ या परिसरात सापळा रचून छापा टाकला. संशयास्पदरीत्या आढळलेल्या हरप्रितसिंग ऊर्फ हॅप्पी महेंद्रसिंग सुनकेवार (वय ४१ वर्षे, रा. पांचाली हॉटेल जवळ, गुरुद्वारा चौरस्ता, नांदेड) याला ताब्यात घेऊन त्याची झडती घेतली असता, त्याच्याकडे विनापरवाना गावठी पिस्तूल आणि ४ जिवंत काडतुसे मिळून आली.
तपासात समोर आले दुसऱ्या आरोपीचे नाव
पोलिसांनी आरोपी हरप्रितसिंग याच्याकडे या शस्त्राबाबत अधिक विचारपूस केली असता, हे अग्नीशस्त्र आणि काडतुसे त्याने तेजिंदरपालसिंग ऊर्फ सोनु भागसिंग लदड (वय २८ वर्षे, रा. गजानन महाराज मंदिर जवळ, मालेगाव रोड, नांदेड) याच्याकडून विकत घेतल्याचे कबूल केले. त्यानंतर पोलिसांनी तात्काळ कारवाई करत दुसऱ्या आरोपीलाही ताब्यात घेतले.
या दोन्ही आरोपींना मुद्देमालासह पुढील कारवाईसाठी वजीराबाद पोलीस ठाण्यात हजर करण्यात आले असून, त्यांच्याविरुद्ध गु.र.नं. २४७/२०२६ नुसार कलम ३/२५ आणि ७/२५ भा.ह.का. अंतर्गत गुन्हा दाखल करण्यात आला आहे. ही कारवाई वजीराबाद पोलीस ठाण्यातील अंमलदार राजीव बोधगिरे (पोकॉ/ खंडणी विरोधी पथक, नांदेड) यांच्या रिपोर्टवरून नोंदवण्यात आली आहे.
या वरिष्ठ अधिकाऱ्यांच्या मार्गदर्शनाखाली झाली कारवाई
ही यशस्वी कामगिरी पोलीस अधीक्षक मा. श्री. अबिनाश कुमार, अप्पर पोलीस अधीक्षक (भोकर) मा. श्रीमती अर्चना पाटील, आणि अप्पर पोलीस अधीक्षक (नांदेड) मा. श्री. सुरज गुरव यांच्या मार्गदर्शनाखाली पार पडली.
स्थानिक गुन्हे शाखेचे पोलीस निरीक्षक श्री. अतुल भोसले यांच्या नेतृत्वात सपोनि विठ्ठल घोगरे, पोकॉ/राजीव बोधगिरे, पोकॉ/गोविंद राठोड, पोकॉ/विठ्ठल वैद्य, पोकॉ/साहेबाराव कदम, पोकॉ/गणेश यादव आणि चापोकॉ/अकबर पठाण यांनी या मोहिमेत महत्त्वाची भूमिका बजावली. एलसीबीच्या या धडक कामगिरीबद्दल पोलीस अधीक्षकांनी संपूर्ण टीमचे विशेष कौतुक केले आहे.
– वृत्त प्रतिनिधी: माधव वाघमारे, नांदेड.
