दोन जिल्ह्यातील पोलिसांना गुंगारा देणारा खुनाचा व दरोड्याचा फरार आरोपी जेरबंद

नांदेड १३ जून पोलीस अधीक्षक अबिनाश कुमार यांच्या मार्गदर्शनाखाली राबविल्या जात असलेल्या ऑपरेशन फ्लॅश आऊट अंतर्गत नांदेड पोलिसांना एक मोठे यश आले आहे. भाग्यनगर पोलीस ठाणे हद्दीतील खुनाच्या आणि उस्माननगर पोलीस ठाणे हद्दीतील दरोड्याच्या गुन्ह्यात गेल्या काही काळापासून फरार असलेल्या एका सराईत आरोपीला भाग्यनगर गुन्हे शोध पथकाने मोठ्या शिताफीने परभणी येथून अटक केली आहे.
सूरज पि. सुनिल कदम (वय २२ वर्षे, रा. विनायकनगर, मराठा बारच्या मागे, नांदेड) असे अटक करण्यात आलेल्या आरोपीचे नाव आहे.

नेमकी घटना काय?

दिनांक ०४ एप्रिल २०२६ रोजी भाग्यनगर पोलीस ठाण्यात खुनाचा गुन्हा (गु.र.नं. १७३/२०२६, कलम १०३(१), १०९, ३(५) BNS सह कलम ४/२५ भा.ह.का.) दाखल झाला होता. हा गुन्हा दाखल झाल्यापासून आरोपी सूरज कदम हा पोलिसांना गुंगारा देऊन फरार झाला होता. पोलीस अधीक्षक अभिनाश कुमार यांनी जिल्ह्यातील फरार व पाहिजे असलेल्या आरोपींवर तात्काळ कारवाई करून त्यांना अटक करण्याचे आदेश सर्व पोलीस ठाण्यांना दिले होते.

परभणी रेल्वे स्टेशन परिसरातून आवळल्या मुसक्या

भाग्यनगर गुन्हे शोध पथकाचे पोलीस उपनिरीक्षक नरेश वाडेवाले आणि त्यांचे पथक या खुनाच्या गुन्ह्यातील आरोपीचा माग काढत होते. दरम्यान, आरोपी सूरज कदम हा परभणी येथे असल्याची गुप्त आणि तांत्रिक माहिती पथकाला मिळाली. वरिष्ठांच्या आदेशाने पथकाने खाजगी वाहनाने तातभितेने परभणी गाठले. तेथे सापळा रचून परभणी रेल्वे स्टेशन परिसर येथून आरोपीला ताब्यात घेण्यात आले.

तपासात दरोड्याचा गुन्हाही उघड

आरोपीला नांदेड येथील भाग्यनगर पोलीस ठाण्यात आणून त्याची सखोल चौकशी व अधिक तपास केला असता, त्याने उस्माननगर पोलीस ठाण्याच्या हद्दीत दरोडा टाकल्याची कबुली दिली. उस्माननगर पोलीस ठाण्यातील अभिलेखाची पाहणी केली असता, त्याच्यावर गु.र.नं. १९४/२०२४, कलम ३१०(४), ३१०(५) BNS सह कलम ३/२५, ४/२५ भा.ह.का. प्रमाणे गुन्हा दाखल असून तो या गुन्ह्यातही गुन्ह्याच्या तारखेपासून (२७ ऑक्टोबर २०२४) फरार असल्याचे समोर आले.

या पथकाने केली कारवाई

ही धडक कारवाई पोलीस अधीक्षक मा. श्री. अबिनाश कुमार, अपर पोलीस अधीक्षक (भोकर) मा. श्रीमती अर्चना पाटील, अपर पोलीस अधीक्षक (नांदेड) मा. श्री. सुरज गुरव, आणि उपविभागीय पोलीस अधिकारी (नांदेड शहर) मा. श्री. रामेश्वर वैंजने यांच्या मार्गदर्शनाखाली करण्यात आली.
कारवाईत भाग्यनगर पोलीस ठाण्याचे पोलीस निरीक्षक संतोष तांबे, गुन्हे शोध पथकाचे पोलीस उपनिरीक्षक नरेश वाडेवाले, पोलीस उपनिरीक्षक विनोद देशमुख, पोहेकॉ. विशाल माळवे, पोकों. विष्णूकांत मुंडे, पोकों. राजीव घुले, पोकों. सुधाकर मरदोडे, पोकों. राहुल लाठकर, पोकों. अदनान पठाण, पोकों. नागनाथ चापके तसेच सायबर सेलचे पोहेकॉ. राजेंद्र सिटीकर व दीपक ओढणे यांनी महत्त्वाची भूमिका बजावली.
या उल्लेखनीय कामगिरीबद्दल पोलीस अधीक्षक अभिनाश कुमार यांनी सर्व अधिकारी व अंमलदारांचे विशेष अभिनंदन केले आहे.
– वृत्त प्रतिनिधी: माधव वाघमारे, नांदेड.