नांदेड १३ जून ( प्रतिनिधी) माधव वाघमारे
नांदेड येथील वजीराबाद पोलीस ठाण्यात दाखल असलेल्या गंभीर फसवणुकीच्या गुन्ह्यातील मुख्य फरार आरोपीचा राजस्थानमधील भरतपूर येथे उपचारादरम्यान मृत्यू झाल्याची धक्कादायक माहिती समोर आली आहे. आदित्य प्रकाश सेनगावकर (वय ४०, रा. नांदेड) असे या मयत आरोपीचे नाव असून, तो स्टेट बँक ऑफ इंडियाच्या डॉक्टर लेन शाखेत ‘कॅश इन्चार्ज’ म्हणून कार्यरत होता. गुन्हा दाखल झाल्यापासून तो पोलिसांना गुंगारा देऊन फरार होता.
नेमकी घटना काय?
आरोपी आदित्य सेनगावकर याच्याविरुद्ध वजीराबाद पोलीस ठाण्यात गुन्हा रजिस्टर नंबर २५३/२६, कलम ३१६(५), ३१८(४), ३(५) भारतीय न्याय संहिता (BNS) अन्वये गुन्हा दाखल करण्यात आला होता. स्टेट बँकेतील आर्थिक गैरव्यवहार प्रकरणी हा गुन्हा दाखल झाल्याचे समजते. गुन्हा दाखल झाल्याचे समजताच आरोपी अटक टाळण्यासाठी नांदेडमधून फरार झाला होता. वजीराबाद पोलीस त्याचा सातत्याने शोध घेत होते.
राजस्थानमध्ये घेतला आश्रय, छातीत दुखू लागल्याने रुग्णालयात दाखल
मिळालेल्या माहितीनुसार, फरार झाल्यानंतर आदित्य सेनगावकर याने राजस्थानमधील भरतपूर येथे आश्रय घेतला होता. तो तेथे ओळख लपवून वास्तव्यास होता. मात्र, अचानक त्याच्या छातीमध्ये तीव्र वेदना होऊ लागल्याने त्यास तातडीने उपचारासाठी भरतपूर येथील SGN हॉस्पिटल मध्ये दाखल करण्यात आले होते.
उपचारादरम्यान मृत्यू, पोलीस तपास सुरू
SGN हॉस्पिटल पोलीस चौकीकडून नांदेडच्या वजीराबाद पोलिसांना मिळालेल्या अधिकृत माहितीनुसार, रुग्णालयात उपचार सुरू असतानाच दिनांक १३ जून २०२६ रोजी पहाटे ०२:२० वाजण्यापूर्वी आदित्य सेनगावकर याचा मृत्यू झाला.
मृत्यूचे नेमके कारण काय?
सध्या मयत आरोपीच्या मृतदेहावर राजस्थानमधील शासकीय रुग्णालयात शवविच्छेदन (Post Mortem) करण्याची प्रक्रिया सुरू आहे. त्याचा मृत्यू हृदयविकाराच्या तीव्र झटक्याने झाला की अन्य काही कारणाने, याचा निश्चित खुलासा ‘पी.एम. रिपोर्ट’ (Post Mortem Report) प्राप्त झाल्यानंतरच होईल, अशी माहिती पोलीस सूत्रांनी दिली आहे.आरोपीच्या मृत्यूची माहिती मिळताच वजीराबाद पोलिसांचे पथक पुढील कायदेशीर कार्यवाहीसाठी रवाना झाले असून, या प्रकरणाचा पुढील तपास पोलीस करत आहेत. मुख्य आरोपीच्या मृत्यूमुळे बँकेतील या आर्थिक घोटाळ्याच्या तपासाला आता कोणती दिशा मिळते, याकडे सर्वांचे लक्ष लागले आहे.
