सोनखेड येथील मोरगे पेट्रोल पंपावरील खून प्रकरणातील आरोपींना स्थानिक गुन्हे शाखेने ठोकल्या बेड्या अवघ्या काही तासांतच कारवाई

नांदेड ११ जून

(प्रतिनिधी, माधव वाघमारे): सोनखेड पोलीस ठाण्याच्या हद्दीतील मोरगे पेट्रोल पंपावर किरकोळ वादातून एका इसमाचा काठीने व लाथाबुक्क्यांनी मारहाण करून निर्घृण खून करण्यात आला होता. या घटनेतील फरार आरोपींचा शोध घेऊन नांदेडच्या स्थानिक गुन्हे शाखेने (LCB) अवघ्या काही तासांतच अत्यंत शिताफीने आरोपींना नांदेड मध्यवर्ती बसस्थानक परिसरातून ताब्यात घेतले आहे.

किरकोळ वादातून घडला थरार

मिळालेल्या माहितीनुसार, दिनांक १०.०६.२०२६ रोजी दुपारी ४:०० वाजताच्या सुमारास सोनखेड हद्दीतील मोरगे पेट्रोल पंपावर दोन इसम आले. त्यांनी तेथील कर्मचारी किफायात अली खाजा मोईनोद्दीन यांना “पेट्रोल पंपावर पेट्रोल आहे का?” अशी विचारणा केली. त्यावर किफायात अली यांनी “मी प्लंबर आहे, तुम्ही पेट्रोल पंपावर विचारपूस करा” असे सांगितले. याच कारणावरून त्यांच्यात अचानक वाद पेटला.
हा वाद इतका टोकाला गेला की, आरोपींनी किफायात अली व साक्षीदार यांना काठीने आणि लाथाबुक्क्यांनी बेदम मारहाण केली. या गंभीर मारहाणीत किफायात अली यांचा मृत्यू झाला. घटनेनंतर आरोपी घटनास्थळावरून फरार झाले होते. याप्रकरणी महेश अशोकराव कोरे (पोउपनि, स्था.गु.शा. नांदेड) यांच्या रिपोर्टवरून सोनखेड पोलीस ठाण्यात गुन्हा रजिस्टर नंबर १२८/२०२६, कलम १०३, ११८(१), ११५(२), ३(५) भा.न्या.सं. अन्वये गुन्हा दाखल करण्यात आला होता.

अशी झाली अटक कारवाई

घटनेचे गांभीर्य ओळखून नांदेडचे पोलीस अधीक्षक श्री. अबिनाश कुमार, अपर पोलीस अधीक्षक (भोकर) श्रीमती अर्चना पाटील आणि अपर पोलीस अधीक्षक (नांदेड) श्री. सुरज गुरव यांनी फरार आरोपींना तात्काळ अटक करण्याचे आदेश दिले होते.
या आदेशान्वये स्थानिक गुन्हे शाखेचे पोलीस निरीक्षक श्री. अतुल भोसले यांनी आपल्या अधिनस्त अधिकाऱ्यांची वेगवेळगी पथके तयार करून आरोपींचा शोध सुरू केला. गुप्त बातमीदाराकडून पथकाला माहिती मिळाली की, सदर गुन्ह्यातील फरार आरोपी हे नांदेडच्या मध्यवर्ती बसस्थानक परिसरात दबा धरून बसले आहेत. माहिती मिळताच गुन्हे शाखेच्या पथकाने बसस्थानक परिसरात सापळा रचून खालील दोन आरोपींना ताब्यात घेतले:
१. पवन राजेभाऊ चौधरी (वय २३ वर्षे, रा. गणपती मंदिराजवळ, सोनखेड)
२. बालाजी शिवाजीराव मोरे (वय ३६ वर्षे, रा. बालाजी मंदिराजवळ, दगडगाव रोड, सोनखेड)
आरोपींची कसून चौकशी केली असता त्यांनी सदर गुन्हा केल्याची कबुली दिली. आरोपींना पुढील कायदेशीर कारवाईसाठी सोनखेड पोलिसांच्या ताब्यात देण्यात आले आहे.

कामगिरी करणारे पोलीस अधिकारी व अंमलदार

सदरची उल्लेखनीय कामगिरी पोलीस अधीक्षक श्री. अबिनाश कुमार, अपर पोलीस अधीक्षक श्रीमती अर्चना पाटील, श्री. सुरज गुरव यांच्या मार्गदर्शनाखाली स्थानिक गुन्हे शाखेचे पोनि अतुल भोसले, सोनखेडचे सपोनि भागवत नागरगोजे, स्था.गु.शा.चे सपोनि विठ्ठल घोगरे, पोउपनि महेश कोरे, पोउपनि साईनाथ पुयड, पोनि नागनाथ तुकडे आणि सोनखेड पोलीस स्टेशनच्या मपोउपनि वैशाली कांबळे यांच्यासह स्थानिक गुन्हे शाखा व सायबर सेलच्या अंमलदारांनी यशस्वीरीत्या पार पाडली.
गुन्ह्यातील आरोपींना अवघ्या काही तासांत जेरबंद केल्याबद्दल पोलीस अधीक्षक, नांदेड यांनी संपूर्ण पोलीस पथकाचे कौतुक केले आहे.