नांदेड १ ऑगस्ट (प्रतिनिधी: माधव वाघमारे)
नांदेड ग्रामीण पोलीस ठाण्याच्या हद्दीतील वाहन चोरीच्या गुन्ह्यांचा शोध घेत असताना पोलीस पथकाला मोठे यश आले आहे. गुन्हे शोध पथकाने धडक कारवाई करत एका अट्टल दुचाकी चोरट्याला ताब्यात घेऊन त्याच्याकडून १ लाख २० हजार रुपये किमतीच्या एकूण तीन मोटारसायकल जप्त केल्या आहेत.
गोपनीय माहितीच्या आधारे सापळा
नांदेड ग्रामीण पोलीस ठाण्यात दाखल गु.र.नं. ९२२/२०२६, कलम ३०३(२) भारतीय न्याय संहिता (BNS) अन्वये दाखल असलेल्या मोटारसायकल चोरीच्या गुन्ह्याचा तपास सुरू असताना, गुन्हे शोध पथकाला दि. ३१ जुलै २०२६ रोजी गोपनीय माहिती मिळाली. चोरीस गेलेली मोटारसायकल मनोज दिनकर सदर (वय ३८ वर्षे, रा. पंचशील बुद्ध विहार जवळ, हडको, नांदेड) याच्या घरी असल्याची खात्रीशीर बातमी मिळताच पथकाने तात्काळ तेथे धाड टाकून संशयित इसमाला ताब्यात घेतले.
तपासात ३ दुचाकी उघडकीस
संशयिताची कसून चौकशी केली असता, त्याच्याकडून नांदेड ग्रामीण पोलीस ठाण्याच्या गुन्ह्यातील MH-26-BW-3734 (किंमत रु. ६०,०००/-) ही मोटारसायकल हस्तगत करण्यात आली. तसेच, त्याच्या राहत्या घराची अधिक पाहणी केली असता MH-26-AP-3166 आणि MH-26-AP-9310 या आणखी दोन संशयास्पद मोटारसायकल मिळून आल्या. या दोन्ही वाहनांबाबत इतर पोलीस ठाण्यांमध्ये चोरीचे गुन्हे दाखल आहेत का, याची पडताळणी सुरु असून पुढील कायदेशीर कारवाई करण्यात येत आहे.
या पथकाने केली यशस्वी कारवाई
ही महत्त्वपूर्ण कारवाई नांदेड जिल्ह्याचे पोलीस अधीक्षक मा. डॉ. नीलाभ रोहन यांच्या मार्गदर्शनाखाली पोलीस निरीक्षक चिंचोलकर, गुन्हे शोध पथकाचे पोलीस उपनिरीक्षक बाबुराव चव्हाण, तसेच पोलीस अंमलदार जाधव, यालावार आणि शिरगिरे (सर्व नेमणूक: नांदेड ग्रामीण पोलीस ठाणे) यांच्या पथकाने यशस्वीरीत्या पार पाडली.
नागरिकांना पोलिसांचे आवाहन:
आपली वाहने नेहमी सुरक्षित आणि अधिकृत ठिकाणीच पार्क करावीत.
वाहनाला दुहेरी (डबल) लॉकचा वापर करावा.
परिसरात कोणतीही संशयास्पद हालचाल किंवा व्यक्ती आढळल्यास तात्काळ जवळच्या पोलीस ठाण्याशी संपर्क साधावा.
