नांदेड ७ मे प्रतिनिधी
जिल्ह्यात अवैध अग्नीशस्त्रे बाळगणाऱ्यांविरुद्ध पोलीस अधीक्षक अबिनाश कुमार यांनी ‘ऑपरेशन क्रॅकडाऊन’ ही विशेष मोहीम हाती घेतली आहे. या मोहिमेअंतर्गत स्थानिक गुन्हे शाखेने मोठी कारवाई करत एका विधीसंघर्षग्रस्त बालकाकडून एक गावठी कट्टा आणि दोन जिवंत काडतुसे जप्त केली आहेत. या कारवाईत एकूण २७,००० रुपयांचा मुद्देमाल हस्तगत करण्यात आला आहे.

नेमकी घटना काय?

नांदेड जिल्ह्यात गुन्हेगारीवर अंकुश मिळवण्यासाठी ३० एप्रिल २०२६ पासून ‘ऑपरेशन क्रॅकडाऊन’ राबवण्यात येत आहे. या मोहिमेअंतर्गत दि. ६ मे २०२६ रोजी पेट्रोलिंग करत असताना, स्थानिक गुन्हे शाखेचे सहाय्यक पोलीस निरीक्षक रवि वाहुळे यांना गोपनीय माहिती मिळाली की, इतवारा भागातील पहेलवान टी हाऊसजवळ एक व्यक्ती बेकायदेशीररीत्या गावठी कट्टा विक्रीसाठी घेऊन येणार आहे.
मिळालेल्या माहितीनुसार, पोलिसांनी या परिसरात सापळा रचून एका संशयित विधीसंघर्षग्रस्त बालकाला ताब्यात घेतले. त्याची अंगझडती घेतली असता, त्याच्याकडे एक लोखंडी गावठी कट्टा आणि दोन जिवंत काडतुसे मिळून आली.

बिहार कनेक्शन उघड

पोलिसांनी ताब्यात घेतलेल्या मुलाकडे सखोल चौकशी केली असता, त्याने हा गावठी कट्टा आणि काडतुसे सत्या (रा. मधुबनी, पटना, बिहार) नावाच्या व्यक्तीकडून खरेदी केल्याचे कबूल केले. या प्रकरणी पोलीस स्टेशन इतवारा येथे गुन्हा दाखल करण्याची प्रक्रिया पूर्ण करण्यात आली आहे.

यांच्या मार्गदर्शनाखाली झाली कारवाई

ही यशस्वी कामगिरी पोलीस अधीक्षक अबिनाश कुमार, अप्पर पोलीस अधीक्षक (भोकर) अर्चना पाटील, आणि अप्पर पोलीस अधीक्षक सूरज गुरव यांच्या मार्गदर्शनाखाली पार पडली. कारवाईत स्थानिक गुन्हे शाखेचे पोलीस निरीक्षक अतुल भोसले, सपोनि रवि वाहुळे, पोलीस उपनिरीक्षक बळीराम दासरे, माधव केंद्रे, गुंडेराव करले आणि त्यांच्या पथकातील अंमलदारांचा सहभाग होता.
पोलीस अधीक्षकांनी या कामगिरीबद्दल सहभागी अधिकारी व कर्मचाऱ्यांचे कौतुक केले आहे.
वृत्त संकलन:
प्रतिनिधी – माधव वाघमारे, नांदेड