🌧️ नांदेड जिल्ह्यासाठी ४ दिवसांचा यलो अलर्ट! विजांचा कडकडाट, वादळी वारे आणि हलका ते मध्यम पाऊस होण्याची शक्यता 🌩️

नांदेड, दि. २६ ऑक्टोबर :-
प्रादेशिक हवामानशास्त्र केंद्र, मुंबई यांनी दिलेल्या ताज्या अंदाजानुसार नांदेड जिल्ह्यासाठी २६ ते २९ ऑक्टोबर २०२५ या चार दिवसांसाठी यलो अलर्ट जारी करण्यात आला आहे. या काळात जिल्ह्यातील काही भागांत ताशी ३० ते ४० किमी वेगाने वादळी वारे, विजांच्या कडकडाटासह आणि ढगांच्या गडगडाटासह हलका ते मध्यम स्वरूपाचा पाऊस पडण्याची शक्यता व्यक्त करण्यात आली आहे.

हवामान विभागाने नागरिकांना सतर्कतेचा इशारा देत सुरक्षित राहण्याचे आवाहन केले असून, जिल्हा प्रशासनानेही सर्व संबंधित यंत्रणांना सज्ज राहण्याचे निर्देश दिले आहेत.

⚠️ खबरदारीची सूचना

✅ या गोष्टी करा:

1️⃣ विजांच्या गडगडाटासह पावसाची शक्यता असल्यास शक्यतो बाहेर जाणे टाळा.
2️⃣ मोकळ्या जागेत असाल तर सखल भागात बसून गुडघ्यात डोके घालून बसावे.
3️⃣ विजा चमकत असल्यास सुरक्षित इमारतीत आश्रय घ्यावा; घराच्या बाल्कनी, छत किंवा ओट्यावर उभे राहू नये.
4️⃣ घरातील विद्युत उपकरणे बंद ठेवावीत.
5️⃣ तारांचे कुंपण, विजेचे खांब, लोखंडी वस्तू व पाण्यापासून दूर राहावे.

🚫 या गोष्टी करू नका:

1️⃣ विजा चमकत असताना लँडलाईन फोनचा वापर करू नका, शॉवरखाली अंघोळ करू नका, नळ किंवा पाईपलाइनला स्पर्श करू नका.
2️⃣ वादळी वाऱ्यात लोखंडी तंबू किंवा शेडमध्ये आसरा घेऊ नका.
3️⃣ उंच झाडाखाली उभे राहू नका.
4️⃣ धातूंच्या उंच मनोऱ्याजवळ थांबू नका.
5️⃣ घरात असताना उघड्या दारातून किंवा खिडकीतून विजा पडताना पाहणे टाळा.

हवामानातील या बदलामुळे शेतकरी, प्रवासी, शालेय विद्यार्थी आणि सर्वसामान्य नागरिकांनी आवश्यक ती काळजी घेणे अत्यावश्यक आहे. जिल्हा प्रशासनाने नागरिकांना सुरक्षित स्थळी राहण्याचे, तसेच अनावश्यक बाहेर पडणे टाळण्याचे आवाहन केले आहे.

🌀 चार दिवस सतर्कता — सुरक्षितता तुमच्या हातात!