नांदेड (प्रतिनिधी माधव वाघमारे): मराठा आरक्षणाच्या लढ्याचे नेते आणि संघर्षयोद्धे मनोज जरांगे पाटील हे सोमवार, दिनांक २ नोव्हेंबर २०२६ रोजी नांदेड जिल्हा दौऱ्यावर येत आहेत. नांदेड दक्षिण विधानसभा मतदारसंघात त्यांचे आगमन होणार असून, मराठा सेवक श्याम पाटील वडजे यांचे वडील स्वर्गीय गणपतराव वडजे पाटील यांच्या प्रथम पुण्यस्मरणानिमित्त आयोजित भव्य कीर्तन सोहळ्यास त्यांची प्रमुख उपस्थिती लाभणार आहे.
स्वर्गीय गणपतराव वडजे पाटील यांच्या स्मृतींना अभिवादन करण्यासाठी श्याम पाटील वडजे परिवाराच्या वतीने या विशेष सोहळ्याचे आयोजन करण्यात आले आहे. हा कार्यक्रम सोमवार, २ नोव्हेंबर रोजी गुंडेगावकर मंगल कार्यालय, उस्माननगर रोड, नांदेड येथे पार पडणार आहे. सकाळी ११ ते दुपारी १ या वेळेत ह.भ.प. ज्ञानेश्वर महाराज वाबळे यांचे सुश्राव्य कीर्तन रंगणार असून, त्यानंतर दुपारी १ ते ५ या वेळेत उपस्थितांसाठी महाप्रसादाची (स्नेहभोजन) व्यवस्था करण्यात आली आहे. सध्या या सोहळ्याची जय्यत तयारी सुरू आहे.
मनोज जरांगे पाटील यांच्या नांदेड दक्षिण भागात होणाऱ्या आगमनामुळे या कार्यक्रमाला सामाजिक व राजकीयदृष्ट्या विशेष महत्त्व प्राप्त झाले आहे. या कार्यक्रमास नांदेड जिल्ह्यातील सामाजिक, राजकीय, वैद्यकीय, सांस्कृतिक, शैक्षणिक व विधी क्षेत्रातील मान्यवर, विविध सामाजिक चळवळींतील कार्यकर्ते, मराठा आरक्षण आंदोलनातील सहकारी, मनोज जरांगे पाटील यांचे समर्थक, मराठा समाजबांधव तसेच वडजे परिवाराचे नातेवाईक आणि आप्तेष्ट मोठ्या संख्येने उपस्थित राहणार आहेत.
सदर कार्यक्रमाच्या यशस्वी आयोजनासाठी वडजे परिवारातील सदस्य, समस्त गावकरी आणि मित्रपरिवार अहोरात्र परिश्रम घेत असल्याची माहिती कार्यक्रमाच्या संयोजिका सौ. सुचिता जोगदंड-वडजे यांनी प्रसिद्धी पत्रकाद्वारे दिली आहे.
