नांदेड १३ डिसेंबर| (प्रतिनिधी) माधव वाघमारे
मकरसंक्रांती व इतर सणांच्या काळात वाढणाऱ्या पतंगबाजीमुळे शहरात नायलॉन मांजाच्या वापराने गंभीर अपघात घडण्याची शक्यता वाढली असून, याबाबत नांदेड पोलिसांनी नागरिकांना कडक इशारा दिला आहे. नायलॉन मांजा हा अत्यंत धारदार व टिकाऊ असल्याने तो मानवी जीव, पक्षी, वाहतूक व पर्यावरणासाठी घातक ठरत आहे.
नांदेड पोलिसांनी प्रसिद्ध केलेल्या जनजागृती संदेशात नायलॉन मांजामुळे होणाऱ्या संभाव्य धोक्यांकडे लक्ष वेधले आहे. पक्ष्यांसाठी मृत्यूचा सापळा, मानवी जीवाला धोका, वाहनचालक व पादचाऱ्यांना गंभीर अपघात, तसेच विद्युत तारांमध्ये अडथळे निर्माण होऊन पर्यावरणाचे मोठ्या प्रमाणात नुकसान होत असल्याचे स्पष्ट करण्यात आले आहे.
विशेषतः दुचाकीस्वार, लहान मुले व ज्येष्ठ नागरिक यांना नायलॉन मांजामुळे गळा कापला जाणे, हात-पाय जखमी होणे असे गंभीर प्रकार घडू शकतात. याशिवाय रस्त्यावर उडणाऱ्या मांजेमुळे वाहनचालकांचे लक्ष विचलित होऊन अपघातांची शक्यता वाढते.
यामुळे नायलॉन मांजा वापरणे, विक्री करणे व साठवणूक करणे कायद्याने गुन्हा आहे, असे पोलिसांनी स्पष्ट केले आहे. कोणीही नायलॉन मांजा विक्री करत असल्याचे किंवा वापरत असल्याचे आढळल्यास तत्काळ पोलिसांना माहिती देण्याचे आवाहन करण्यात आले आहे.
नागरिकांसाठी महत्त्वाचे आवाहन :
- नायलॉन मांजा वापरू नका, विकू नका
- सुरक्षित व पर्यावरणपूरक कापसाच्या मांजाचाच वापर करा
- कोणतीही संशयास्पद विक्री आढळल्यास तात्काळ पोलिसांना कळवा
- आपत्कालीन परिस्थितीत डायल 112 वर संपर्क साधा
नांदेड पोलिस प्रशासनाने नागरिकांच्या सुरक्षिततेसाठी सहकार्य करण्याचे आवाहन करत, पतंगबाजी आनंदासाठी असावी; जीवघेणी ठरू नये, असे स्पष्ट संदेश दिला आहे.
