नांदेड | दि. 13 डिसेंबर 2025 (प्रतिनिधी) माधव वाघमारे
नांदेड शहरातील सार्वजनिक ठिकाणी दारू पिऊन शांततेचा भंग करणाऱ्यांविरोधात नांदेड पोलिसांनी कडक भूमिका घेतली आहे. पोलीस अधीक्षक मा. श्री. अबिनाश कुमार यांच्या मार्गदर्शनाखाली ‘नांदेड सिटी स्ट्रिट सेफ्टी ड्राईव्ह’ अंतर्गत शहरात विशेष मोहीम राबविण्यात आली. या मोहिमेद्वारे सार्वजनिक ठिकाणी दारू पिऊन गोंधळ घालणाऱ्या इसमांवर धडक कारवाई करण्यात आली.
पोलीस अधीक्षक मा. श्री. अविनाश कुमार तसेच अपर पोलीस अधीक्षक मा. श्री. सुरज गुरव यांच्या सूचना व मार्गदर्शनानुसार 12 डिसेंबर 2025 रोजी शहरातील विविध पोलीस ठाण्यांच्या हद्दीत ही कारवाई पार पडली. संबंधित पोलीस ठाण्यांचे अधिकारी व अंमलदार यांनी पेट्रोलिंगदरम्यान सार्वजनिक शांततेचा भंग करणाऱ्यांना ताब्यात घेत कायदेशीर कारवाई केली.
भाय्यनगर पोलीस ठाणे हद्दीत कारवाई
स्नेहनगर, जंगमवाडी परिसरात पेट्रोलिंगदरम्यान 5 इसम दारूच्या नशेत आढळून आले. त्यांच्यावर कलम 110/117 महाराष्ट्र पोलीस कायद्यानुसार कारवाई करण्यात आली. तसेच जंगमवाडी रोड येथे एका वाहनास नंबर नसल्याने वाहनावर 500 रुपयांचा दंड ठोठावण्यात आला. पूर्णा रोड परिसरात दारू विक्री करताना आढळलेल्या एका इसमावर महाराष्ट्र दारूबंदी अधिनियम कलम 68 अन्वये गुन्हा दाखल करण्यात आला.
नांदेड ग्रामीण पोलीस ठाणे हद्दीत कारवाई
एम.आय.डी.सी., ढवळे चौक व स्वामी वाईन शॉप परिसरात पेट्रोलिंग करताना 6 इसम दारूच्या नशेत सार्वजनिक शांततेचा भंग करताना आढळले. त्यांच्यावर कलम 110/117 अन्वये कारवाई करण्यात आली. यावेळी परिसरातील दारू दुकाने, वाईन शॉप्स व हॉटेल्सची तपासणीही करण्यात आली.
इतवारा पोलीस ठाणे हद्दीत कारवाई
जुना मोंढा परिसरात 1 इसम दारूच्या नशेत गोंधळ घालताना आढळून आला. त्याच्यावरही कलम 110/117 अन्वये कारवाई करण्यात आली. सोबतच हद्दीतील दारू दुकाने, वाईन शॉप्स व हॉटेल्सची तपासणी करण्यात आली.
विमानतळ पोलीस ठाणे हद्दीत कारवाई
शिवनेरी, हातोडा चौक परिसरात 9 इसम दारूच्या नशेत आरडाओरड व गोंधळ करताना आढळले. त्यांच्यावर महाराष्ट्र पोलीस कायद्यानुसार कारवाई करण्यात आली. या भागातही दारू दुकाने, वाईन शॉप्स व हॉटेल्सची सखोल तपासणी करण्यात आली.
दामिनी पथकाची कारवाई
विश्रांत गार्डन परिसरात दामिनी पथकाने पेट्रोलिंगदरम्यान 6 इसम दारूच्या नशेत आढळून आले. त्यांच्यावर शिवाजीनगर पोलीस ठाण्यात कलम 110/117 अन्वये कारवाई करण्यात आली.
यावेळी पोलीस अधीक्षक मा. श्री. अबिनाश कुमार यांनी स्पष्ट इशारा दिला की, नांदेड शहरातील कोणत्याही सार्वजनिक ठिकाणी दारू पिणे, दारू पिण्यासाठी जागा उपलब्ध करून देणे किंवा सार्वजनिक शांततेचा भंग करणे खपवून घेतले जाणार नाही. अशा प्रकारांवर यापुढेही कठोर कायदेशीर कारवाई करण्यात येईल, असे आवाहन त्यांनी नागरिकांना केले आहे.
नांदेड पोलिसांच्या या कारवाईमुळे शहरात शिस्त व सुरक्षिततेचा संदेश पोहोचला असून, नागरिकांनी पोलिस प्रशासनास सहकार्य करावे, असे आवाहन करण्यात आले आहे.
