श्रीक्षेत्र माळेगाव यात्रा दिनांक २३ डिसेंबर २०२५
(प्रतिनिधी)
माधव वाघमारे
जगात आगळी-वेगळी ओळख असलेली श्रीक्षेत्र माळेगावची यात्रा कृषी व पशुसंवर्धनासाठी विशेषतः प्रसिद्ध असून पशुपालक व दुग्ध व्यवसायिकांसाठी ही यात्रा प्रेरणास्थान ठरत असल्याचे प्रतिपादन आमदार प्रतापराव पाटील चिखलीकर यांनी केले.
पशुसंवर्धन विभागाच्या वतीने आयोजित विविध पशु व दुग्ध स्पर्धांमधील विजेत्यांना पारितोषिकांचे वितरण करताना ते बोलत होते. यंदा या स्पर्धांना शेतकरी व पशुपालकांचा मोठ्या प्रमाणात उत्स्फूर्त प्रतिसाद लाभला.
यावेळी बोलताना आमदार चिखलीकर यांनी स्पर्धांच्या पारितोषिक रकमेत वाढ करण्यात आल्याचे सांगितले. तसेच पूर्वीप्रमाणे माळेगाव यात्रेत घोडा, गाढव व उंट यांच्या शर्यती पुन्हा सुरू व्हाव्यात, अशी अपेक्षाही त्यांनी व्यक्त केली.
कार्यक्रमास उद्घाटक म्हणून जिल्हाधिकारी राहुल कर्डिले, जिल्हा परिषदेच्या मुख्य कार्यकारी अधिकारी मेघना कावली, माजी आमदार मोहनअण्णा हंबर्डे, लोहा नगरपरिषदेचे नगराध्यक्ष शरद पवार, अतिरिक्त मुख्य कार्यकारी अधिकारी संदीप माळोदे, उपमुख्य कार्यकारी अधिकारी तथा यात्रा सचिव डी.बी. गिरी, सरपंच प्रतिनिधी हनमंत धुळगंडे, दत्ता वाले, रोहित पाटील, जिल्हा पशुसंवर्धन उपायुक्त डॉ. राजकुमार पडिले, डॉ. प्रवीणकुमार घुले आदी मान्यवर उपस्थित होते.
माळेगावची यात्रा अधिक व्यापक स्वरूपात विकसित करण्यासाठी प्रयत्न सुरू असून यावर्षी जिल्हा परिषदेने अचूक नियोजन केल्याचे आमदार चिखलीकर यांनी सांगितले. पुढील वर्षी दुग्ध व्यवसाय वाढीस चालना देण्यासाठी तसेच शेतकऱ्यांना जोडधंद्यास प्रोत्साहन मिळावे यासाठी विविध खाजगी दूध डेऱ्यांचा सहभाग घेतला जाणार असल्याचेही त्यांनी स्पष्ट केले.
कार्यक्रमाचे प्रास्ताविक जिल्हा पशुसंवर्धन उपायुक्त डॉ. राजकुमार पडिले यांनी केले. यावेळी लाल कंधारी व देवणी नर-मादी गटाचे चॅम्पियन तसेच विविध स्पर्धांमध्ये क्रमांक पटकावलेल्या स्पर्धकांना रोख रक्कम, स्मृतिचिन्ह, प्रमाणपत्र व पुष्पहार देऊन सन्मानित करण्यात आले.
दुग्ध स्पर्धेसाठी नमस्कार दूध डेअरी, मस्कटी दूध डेअरी व एपीएस दूध डेअरी यांनी पुढाकार घेतला. संग्राम गाडेकर, नितीन शिंदे व सतीश कोगनळे यांनी विशेष सहकार्य करून दुग्ध व्यवसाय करणाऱ्या शेतकऱ्यांना प्रोत्साहन दिले.
