नांदेड |२५ डिसेंबर (प्रतिनिधी) माधव वाघमारे
मुख्यमंत्री समृद्ध पंचायतराज अभियान २०२५ अंतर्गत ग्रामपंचायत वडवणा/खडकी, ता. जि. नांदेड येथे दिनांक १५ डिसेंबर २०२५ रोजी सकाळी ११.०० वाजता विविध विकासकामांचा भव्य कार्यक्रम पार पडला. या कार्यक्रमाचे उद्घाटन गटविकास अधिकारी पंचायत समिती नांदेड श्री. प्रवीण सुरडकर यांच्या हस्ते करण्यात आले. यावेळी विस्तार अधिकारी श्री. व्ही. बी. कांबळे यांची प्रमुख उपस्थिती होती.
कार्यक्रमास सरपंच परिषदेचे जिल्हाध्यक्ष श्री. नारायण पाटील कदम, सरपंच प्रतिनिधी श्री. संजय पोहरे, ग्रामपंचायत अधिकारी श्री. के. एस. तिडके, ग्रामपंचायत सदस्य, गावकरी, शिक्षकवृंद, आशा वर्कर, मनरेगा अंतर्गत एपीओ श्री. शुभम कांबळे, श्री. नागेश फुलारी, तांत्रिक अधिकारी श्री. कदम तसेच ग्रामपंचायत स्तरावरील सर्व अधिकारी व कर्मचारी मोठ्या संख्येने उपस्थित होते.
या प्रसंगी जलतारा शोषखड्याचे विधिवत भूमिपूजन करण्यात आले. त्यानंतर मुख्यमंत्री समृद्ध पंचायतराज अभियानांतर्गत विविध विकासकामांना सुरुवात करण्यात आली. जलसंवर्धनासाठी ५० जलतारा शोषखड्यांची कामे हाती घेण्यात आली असून पर्यावरण संवर्धनाच्या दृष्टीने गटविकास अधिकारी श्री. प्रवीण सुरडकर यांच्या हस्ते वृक्षलागवड करून तब्बल २०० वृक्ष लावण्यात आले.
ग्रामपंचायतीमध्ये घनकचरा व्यवस्थापनासाठी सेग्रीगेशन शेडचे बांधकाम सुरू करण्यात आले. जिल्हा परिषद शाळेची तपासणी करून विद्यार्थ्यांच्या शैक्षणिक प्रगतीचा आढावा घेण्यात आला. यावेळी प्लास्टिक बंदीबाबत जनजागृती करण्यात आली तसेच शाळकरी मुलांना मार्गदर्शनही करण्यात आले. ग्रामपंचायतीत लोकवर्गणीतून शाळकरी मुलांना स्कूल बॅगचे वाटप करण्यात आले.
गावातील सुरक्षिततेसाठी मुख्य चौक व इतर ठिकाणी सी.सी.टी.व्ही. कॅमेरे बसविण्यात आले. महिला व पुरुषांसाठी आरोग्य तपासणी शिबिराचे आयोजन करण्यात आले. ग्रामपंचायत इमारत, शाळा, अंगणवाडी इमारत तसेच स्मशानभूमीची रंगरंगोटी करण्यात आली. माझी मुलगी माझा अभिमान या उपक्रमांतर्गत गावातील सर्व घरांवर मुलींची नावे लावण्यात आली असून गावाच्या दर्शनी भागात सुविचार व प्रबोधनात्मक स्लोगन लिहिण्यात आले.
ऊर्जासंवर्धनाच्या दृष्टीने ग्रामपंचायत व शाळा इमारतींवर सौर पॅनल बसवून विद्युत पुरवठा सुरू करण्यात आला आहे. गावकऱ्यांच्या सक्रिय सहभागातून मोठ्या प्रमाणावर विकासकामे सुरू असल्याबद्दल गटविकास अधिकारी श्री. प्रवीण सुरडकर यांनी समाधान व्यक्त केले.
मुख्यमंत्री समृद्ध पंचायतराज अभियानामुळे वडवणा/खडकी गावाचा सर्वांगीण विकास होत असून ग्रामस्थांमध्ये उत्साहाचे वातावरण निर्माण झाले आहे.
