नांदेडचे सुप्रसिद्ध प्रकाशक निर्मल कुमार सूर्यवंशी यांचा पद्मश्री नारायण सुर्वे जीवन गौरव सन्मान’ मिळाल्याबद्दल सत्कार

नांदेड | २६ डिसेंबर प्रतिनिधी माधव वाघमारे
कविवर्य नारायण सुर्वे साहित्य कला अकादमी, पुणे यांच्या वतीने देण्यात येणारा प्रतिष्ठेचा ‘पद्मश्री नारायण सुर्वे जीवन गौरव सन्मान पुरस्कार’ यंदा नांदेडचे ज्येष्ठ प्रकाशक व साहित्यसेवक निर्मल कुमार सूर्यवंशी यांना प्रदान करण्यात आला. त्यांच्या ५५ वर्षांच्या अखंड साहित्यसेवेचा आणि ‘अक्षरनातीचा’ या महत्त्वपूर्ण साहित्यकृतीचा गौरव म्हणून हा मानाचा पुरस्कार देण्यात आला आहे.

या सन्मानाबद्दल कृतज्ञता व्यक्त करण्यासाठी आज नांदेड येथील त्यांच्या प्रकाशन कार्यालयात जाऊन पुष्पगुच्छ देऊन निर्मल कुमार सूर्यवंशी यांचा सत्कार करण्यात आला. यावेळी साहित्य, सामाजिक व सांस्कृतिक क्षेत्रातील अनेक मान्यवर उपस्थित होते.

या सत्कारप्रसंगी मातोश्री भागाबाई विठ्ठलराव डोंगरे प्रतिष्ठान, उमरीचे सर्वेसर्वा मा. नागोराव डोंगरे तसेच अक्षरोदय साहित्य मंडळ, महाराष्ट्र राज्य या साहित्य संस्थेचे कार्याध्यक्ष मा. सदानंद सपकाळे हे विशेष उपस्थित होते.

यावेळी बोलताना मान्यवरांनी सांगितले की,
“निर्मल कुमार सूर्यवंशी यांनी गेल्या पाच दशकांहून अधिक काळ साहित्य प्रकाशन क्षेत्रात अविरत कार्य करत अनेक नवोदित तसेच प्रस्थापित लेखकांना व्यासपीठ उपलब्ध करून दिले. त्यांचे कार्य केवळ प्रकाशनापुरते मर्यादित नसून, ते मराठी साहित्यसंस्कृती जपणारे व वृद्धिंगत करणारे आहे.”

‘अक्षरनातीचा’ ही साहित्यकृती मराठी साहित्यविश्वात स्वतंत्र ओळख निर्माण करणारी असून, तिच्या माध्यमातून साहित्य, समाज आणि संस्कृती यांचे अतूट नाते प्रभावीपणे अधोरेखित करण्यात आले आहे. अशा मोलाच्या कार्याची दखल घेऊन देण्यात आलेला पद्मश्री नारायण सुर्वे जीवन गौरव सन्मान हा अत्यंत योग्य व प्रेरणादायी असल्याचे मत उपस्थितांनी व्यक्त केले.

सत्काराला उत्तर देताना निर्मल कुमार सूर्यवंशी यांनी भावना व्यक्त करताना सांगितले की,
“हा सन्मान माझ्या एकट्याचा नसून, माझ्यासोबत वाटचाल करणाऱ्या लेखक, वाचक आणि साहित्यप्रेमींचा आहे. पद्मश्री नारायण सुर्वे यांचे विचार व संघर्ष सदैव प्रेरणादायी राहिले असून, त्यांच्या नावाने मिळालेला हा पुरस्कार माझ्या आयुष्यातील अत्यंत मोठा सन्मान आहे.”

हा कार्यक्रम अत्यंत आपुलकीच्या, उत्साहपूर्ण आणि साहित्यिक वातावरणात पार पडला. उपस्थित साहित्यप्रेमींनी निर्मल कुमार सूर्यवंशी यांच्या पुढील साहित्यिक वाटचालीस शुभेच्छा देत त्यांच्या कार्याबद्दल गौरवोद्गार काढले.