नांदेड २ जानेवारी (प्रतिनिधी) माधव वाघमारे
नांदेड जिल्ह्यातील वाढत्या चोरीच्या गुन्ह्यांना आळा घालण्यासाठी राबविण्यात येत असलेल्या विशेष मोहिमेअंतर्गत स्थानिक गुन्हे शाखा, नांदेड यांनी प्रभावी कारवाई करत जेरबंद करण्यात आलेल्या आरोपीकडून अंदाजे ३५ हजार रुपये किंमतीची एक ऑरेंज रंगाची स्कूटी जप्त केली आहे.
पोलीस अधीक्षक नांदेड मा. श्री. अबिनाश कुमार, अप्पर पोलीस अधीक्षक भोकर मा. श्रीमती अर्चना पाटील व अप्पर पोलीस अधीक्षक नांदेड मा. श्री. सुरज गुरव यांच्या मार्गदर्शनाखाली ही कारवाई करण्यात आली. स्थानिक गुन्हे शाखेचे पोलीस निरीक्षक श्री. उदय खंडेराय यांच्या नेतृत्वाखाली पोलीस उपनिरीक्षक साईनाथ पुयड तसेच पथकातील अंमलदारांनी ही कामगिरी बजावली.
दिनांक ३१ डिसेंबर २०२५ रोजी मिळालेल्या गोपनीय माहितीनुसार चोरीस गेलेली स्कूटी नांदेड शहर परिसरात वापरात असल्याची माहिती पथकाला मिळाली होती. त्यानुसार संशयित इसमाचा शोध घेऊन त्याला ताब्यात घेण्यात आले. चौकशीत सदर आरोपीने चोरीच्या गुन्ह्याची कबुली दिली असून त्याच्याकडून एक ऑरेंज रंगाची स्कूटी हस्तगत करण्यात आली. या स्कूटीची किंमत अंदाजे ३५,००० रुपये इतकी आहे.
या प्रकरणी पोलीस स्टेशन बारड येथे गुन्हा क्रमांक ११३/२०२५ अंतर्गत भारतीय न्याय संहिता (BNS) कलम ३०९(६), ३(५) नुसार गुन्हा दाखल करण्यात आला आहे. पुढील तपास सुरू असून आरोपीविरुद्ध कायदेशीर कारवाई करण्यात येत आहे. नांदेड जिल्ह्यातील मालमत्तेविरुद्धचे गुन्हे उघडकीस आणण्यासाठी पोलीस प्रशासनाने कारवाई अधिक तीव्र केली असून नागरिकांनी सहकार्य करावे, असे आवाहन करण्यात आले आहे.
