नांदेड | प्रतिनिधी : माधव वाघमारे | दि. १२ फेब्रुवारी
महाराष्ट्र लोकसेवा हक्क अधिनियम २०१५ अंतर्गत नागरिकांना वेळेत व पारदर्शक सेवा मिळावी, यासाठी नांदेड जिल्ह्यातील पोलिस यंत्रणेकडून काटेकोर अंमलबजावणी करण्याचे स्पष्ट निर्देश देण्यात आले. लोकसेवा हक्क आयोगाचे मा. आयुक्त श्री. किरण जाधव (सेवानिवृत्त भापोसे) यांनी आज नांदेड येथील पोलीस अधीक्षक कार्यालयास भेट देऊन आढावा बैठक घेतली. यावेळी पोलीस अधीक्षक श्री. अविनाश कुमार यांची प्रमुख उपस्थिती होती.
या बैठकीस नांदेड जिल्ह्यातील सर्व उपविभागीय पोलिस अधिकारी, पोलीस ठाणे प्रभारी अधिकारी तसेच गोपनीय शाखेचे अधिकारी उपस्थित होते. बैठकीदरम्यान लोकसेवा हक्क अधिनियमांतर्गत पोलिस विभागामार्फत नागरिकांना देण्यात येणाऱ्या विविध सेवांचा सविस्तर आढावा घेण्यात आला.
मा. आयुक्त श्री. किरण जाधव यांनी स्पष्ट केले की, अधिनियमानुसार शासनाने जाहीर केलेल्या सेवांची पूर्तता संबंधित विभागाने विहित कालमर्यादेत करणे कायदेशीरदृष्ट्या बंधनकारक आहे. सेवा देण्यात दिरंगाई झाल्यास संबंधित अधिकारी जबाबदार धरले जाऊ शकतात, अशी तरतूद अधिनियमात आहे. त्यामुळे प्रत्येक प्रकरणात वेळेचे काटेकोर पालन करण्याचे निर्देश त्यांनी दिले.
सेवा अर्ज प्राप्त झाल्यानंतर नोटीस ठराविक मुदतीत निकालात काढणे, अपील प्रक्रिया पारदर्शक ठेवणे तसेच नागरिकांना अचूक माहिती देणे या बाबींवर विशेष भर देण्यास सांगण्यात आले. पोलिस विभागाकडील पासपोर्ट पडताळणी, ऑनलाइन चारित्र्य पडताळणी व इतर सेवांमध्ये चांगली अंमलबजावणी केल्याबद्दल मा. आयुक्तांनी पोलिस प्रशासनाचे कौतुक केले.
यावेळी पोलीस अधीक्षक श्री. आबिनाश कुमार यांनी उपस्थित अधिकाऱ्यांना मार्गदर्शन करताना, अधिनियमाची प्रभावी अंमलबजावणी करून प्रलंबित प्रकरणे तातडीने निकाली काढावीत व नागरिकांच्या तक्रारींवर संवेदनशीलतेने कार्यवाही करावी, असे निर्देश दिले.
लोकाभिमुख दृष्टिकोन ठेवून महाराष्ट्र लोकसेवा हक्क अधिनियम २०१५ ची काटेकोर अंमलबजावणी करण्याचा संकल्प पोलिस प्रशासनाने यावेळी व्यक्त केला.
