प्रतिनिधी: माधव वाघमारे
नांदेड, दि. 1 मार्च: दिल्ली आणि पंजाबमध्ये खून, फायरिंग, धमकी देणे यासारख्या गंभीर स्वरूपाच्या सहा गुन्ह्यांमध्ये फरार असलेल्या आरोपीस नांदेडच्या स्थानिक गुन्हे शाखेच्या पथकाने अटक केली आहे. ही कारवाई स्पेशल सेल दिल्लीच्या पोलिसांना सहाय्य करताना करण्यात आली.
पोलीस अधीक्षक अबिनाश कुमार यांच्या मार्गदर्शनाखाली स्थानिक गुन्हे शाखेचे पोलीस निरीक्षक उदय खंडेराय यांच्या नेतृत्वात ही मोहीम राबविण्यात आली. पोलीस अधीक्षकांनी दिलेल्या आदेशानुसार, स्पेशल सेल दिल्लीच्या पथकाला मदत करण्यासाठी पोलीस निरीक्षक उदय खंडेराय यांच्या मार्गदर्शनाखाली सपोलीस निरीक्षक रवी वाहुळे, पोलीस उपनिरीक्षक महेश कोरे आणि त्यांच्या पथकाने ही कामगिरी केली.
गोपनीय माहितीच्या आधारे, फरार आरोपी नांदेड शहरात लपल्याची माहिती मिळाली. पोलिसांनी सापळा रचून आरोपीास ताब्यात घेतले. आरोपीने आपले नाव अर्जदीपसिंग उर्फ जसविंदरसिंग (वय 27, रा. धर्मा, जि. होशियारपूर, पंजाब) असल्याचे सांगितले. चौकशीदरम्यान त्याने दिल्ली व पंजाबमध्ये खून, फायरिंगसह इतर गंभीर गुन्हे केल्याची कबुली दिली. दिल्लीच्या स्पेशल सेल पोलीस ठाण्यात त्याच्याविरोधात गुन्हा क्रमांक 304/2025 भा.न्याय संहिता कलम 61(2) आणि भारतीय शस्त्र अधिनियम कलम 25, 25(8) प्रमाणे गुन्हा दाखल होता.
आरोपी अर्जदीपसिंगला पुढील कारवाईसाठी स्पेशल सेल दिल्लीच्या पोलिसांच्या ताब्यात देण्यात आले आहे. पोलीस अधीक्षक अभिनाश कुमार यांनी या कामगिरीबद्दल पोलीस निरीक्षक उदय खंडेराय, सपोनि रवी वाहुळे, पोउपनि महेश कोरे, तसेच पथकातील पोलीस अंमलदार बळीराम दासरे, माधव केडे, गुंडेराव करळे, सिष्टु सोनसळे, राजदीपसिंग, मोतीराम पवार, श्रीराम दासरे आणि संग्राम गायकवाड यांचे कौतुक व अभिनंदन केले.
