नांदेड: २० मार्च प्रतिनिधी माधव वाघमारे
शहरातील वाढती वाहतूक कोंडी आणि नियमांना केराची टोपली दाखवणाऱ्या वाहनधारकांविरुद्ध नांदेड पोलिसांनी मोठी मोहीम उघडली आहे. पोलीस अधीक्षक अबिनाश कुमार यांच्या आदेशानुसार, शहर वाहतूक शाखा वजीराबाद आणि इतवारा यांनी संयुक्त कारवाई करत गुरुवारी (१९ मार्च) एकाच दिवसात तब्बल २६० केसेस नोंदवल्या असून, २,५१,९०० रुपयांचा दंड आकारला आहे.
वजीराबाद शाखेची मोठी कारवाई
सहाय्यक पोलीस निरीक्षक भागवत नागरगोजे यांच्या नेतृत्वाखाली रेल्वे स्टेशन रोड, वजीराबाद चौक, कलामंदिर, वर्कशॉप, राजकॉर्नर आणि छत्रपती चौक या भागांत कडक तपासणी करण्यात आली. यामध्ये प्रामुख्याने:
- विना परवाना/परमिट वाहने.
- भरधाव वेगाने चालणारी वाहने.
- ‘फटाका’ सायलेंट लावलेल्या बुलेट गाड्या.
- ट्रिपल सीट आणि गणवेश नसलेले ऑटो चालक.
या कारवाईत वजीराबाद शाखेने २४९ केसेस करून २,४२,६५० रुपयांचा दंड वसूल केला.
इतवारा भागातही कारवाईचा बडगा
दुसरीकडे, पोलीस निरीक्षक जगन पवार यांच्या पथकाने बर्की चौक, देगलूर नाका आणि सिडको भागात कागदपत्रांची तपासणी केली. वाहतुकीस अडथळा निर्माण करणाऱ्या वाहनांवर कारवाई करत ११ केसेस नोंदवून ९,२५० रुपयांचा दंड आकारला.
प्रशासनाचे आवाहन
वाहतूक पोलिसांनी नागरिकांना कळकळीचे आवाहन केले आहे की: - रस्त्यावर कोठेही अस्ताव्यस्त पार्किंग करू नये, अधिकृत पार्किंगचाच वापर करावा.
- रस्त्यात फळगाड्या किंवा इतर अतिक्रमणे करून वाहतुकीस अडथळा आणू नये.
- सिग्नलचे पालन करावे आणि पोलीस प्रशासनास सहकार्य करावे.
“वाहतूक नियमांचे उल्लंघन केल्यास मोटार वाहन कायद्यांतर्गत यापुढेही अशीच कडक कारवाई सुरू राहील,” असा इशारा पोलीस प्रशासनाकडून देण्यात आला आहे.
ही संपूर्ण कारवाई पोलीस अधीक्षक अबिनाश कुमार, अपर पोलीस अधीक्षक सुरज गुरव यांच्या मार्गदर्शनाखाली शहर वाहतूक शाखेच्या अधिकारी व अंमलदारांनी यशस्वी केली आहे.
