नांदेड परिक्षेत्रात गुटखा माफियांवर खाकीचा प्रहार

नांदेड १ एप्रिल प्रतिनिधी
राज्यात गुटखा व प्रतिबंधित तंबाखूजन्य पदार्थांच्या विक्रीवर बंदी असतानाही छुप्या मार्गाने विक्री करणाऱ्यांविरुद्ध पोलीस उप महानिरीक्षक कार्यालयाने कंबर कसली आहे. पोलीस उप महानिरीक्षक श्री शहाजी उमाप यांच्या विशेष पथकाने इतवारा पोलीस ठाण्याच्या हद्दीत मोठी कारवाई करून ५ लाख ३ हजार ७४० रुपयांचा गुटखा जप्त केला आहे. या प्रकरणी चार जणांविरुद्ध गुन्हा दाखल करण्यात आला असून गुटखा रॅकेटचे धागेदोरे शोधण्याचे काम सुरू आहे.
गोपनीय माहितीच्या आधारे छापा
नांदेड परिक्षेत्रात गुटखा निर्मूलनासाठी १६ मार्च २०२६ पासून विशेष मोहीम उघडण्यात आली आहे. याच मोहिमेअंतर्गत, ३१ मार्च रोजी विशेष पथकाला माहिती मिळाली की, इतवारा भागातील एका पत्र्याच्या शेडमध्ये मोठ्या प्रमाणात गुटख्याचा साठा करून ठेवला आहे. या माहितीची शहानिशा करण्यासाठी पथकाने इस्लामपुरा भागातील शर्मा यांच्या मळ्यातील शेडवर छापा टाकला. या कारवाईत ५,०३,७४० रुपयांचा प्रतिबंधित गुटखा पोलिसांच्या हाती लागला.
या आरोपींविरुद्ध झाली कारवाई
या प्रकरणी पोलिसांनी चार संशयितांना निष्पन्न केले असून त्यांच्याविरुद्ध इतवारा पोलीस ठाण्यात गु.र.नं. ९३/२०२६ नुसार भारतीय न्याय संहिता कलम १२३, २७४, २७५, ३(५) अन्वये गुन्हा दाखल केला आहे. कारवाई करण्यात आलेल्या आरोपींची नावे खालीलप्रमाणे आहेत:
१) मोहम्मद शोएब मोहम्मद अकबर (रा. मदिना नगर, देगलूर नाका, नांदेड)
२) शेख अमीर (रा. हिमायतनगर, नांदेड)
३) शेख अजिम परभणीवाला (रा. परभणी)
४) बबलू शेख अजिमोद्दीन अब्दुल हमीद (रा. मदिना नगर, मुदखेड)
शेजारील राज्यातून पुरवठा; रॅकेटचे जाळे मोठे
पोलिसांनी दिलेल्या माहितीनुसार, मुख्य आरोपी मोहम्मद शोएब याच्याकडे हा माल मिळून आला. प्राथमिक तपासात धक्कादायक माहिती समोर आली आहे की, हे चारही आरोपी संघटितपणे गुटखा व्यवसायात कार्यरत आहेत. ते शेजारील राज्यांतून मोठ्या प्रमाणात गुटखा खरेदी करून नांदेड व परभणी जिल्ह्यातील किरकोळ व्यापाऱ्यांना त्याचा पुरवठा करत होते. या साखळीत आणखी अनेक लोकांचा समावेश असण्याची शक्यता वर्तवण्यात येत आहे.
पुढील तपास सुरू
पोलीस उप महानिरीक्षक कार्यालयाने ही मोहीम अधिक तीव्र करण्याचे संकेत दिले आहेत. सध्या या प्रकरणाचा पुढील तपास इतवारा पोलीस ठाण्याचे पोउपनि आगलावे हे करत आहेत. आरोपींच्या गुन्हेगारी पार्श्वभूमीचीही तपासणी केली जात असून, या रॅकेटमधील इतर सदस्यांचा शोध घेण्यासाठी पोलीस पथके रवाना करण्यात आली आहेत.
वृत्त संकलन
प्रतिनिधी: माधव वाघमारे