नांदेड १ एप्रिल प्रतिनिधी
शहरातील वाढती वाहतूक कोंडी आणि नियमांचे उल्लंघन करणाऱ्यांविरोधात पोलीस अधीक्षक अभिनश कुमार यांच्या मार्गदर्शनाखाली शहर वाहतूक शाखा वजीराबादने धडक मोहीम राबवली आहे. ३१ मार्च रोजी शहरातील विविध भागांत केलेल्या या कारवाईत तब्बल २०१ केसेस दाखल करण्यात आल्या असून, २ लाख ३१ हजार ५०० रुपयांचा दंड आकारण्यात आला आहे.
शहरातील वाहतूक व्यवस्था शिस्तबद्ध करण्यासाठी आणि अपघातांना आळा घालण्यासाठी अवैध प्रवासी वाहतूक, विना परवाना वाहन चालवणे, भरधाव वेगाने वाहन चालवणे, फटाका बुलेट (सायलेन्सर मॉडिफिकेशन), वाहन चालवताना मोबाईलचा वापर करणे आणि रस्त्यावर अडथळा निर्माण करणाऱ्या अनधिकृत फळगाड्यांवर कारवाई करण्याचे आदेश पोलीस अधीक्षक अभिनश कुमार यांनी दिले होते.
या भागात झाली तपासणी
सहायक पोलीस निरीक्षक भागवत नागरगोजे आणि त्यांच्या पथकाने शहरातील प्रमुख ठिकाणांवर ही मोहीम राबवली. यात प्रामुख्याने:
- रेल्वे स्टेशन रोड
- महावीर चौक
- कलामंदिर
- वर्कशॉप
- राजकॉर्नर
- छत्रपती चौक
या ठिकाणी वाहनांच्या कागदपत्रांची कसून तपासणी करण्यात आली. तसेच रिक्षा चालकांनी गणवेश परिधान करण्याबाबतही कडक सूचना देण्यात आल्या आहेत.
वाहतुकीला अडथळा ठरणारे रडारवर
ट्रिपल सीट दुचाकी, परवाना नसलेली वाहने आणि रस्त्याच्या कडेला अनधिकृतपणे उभ्या राहणाऱ्या फळगाड्यांमुळे वाहतुकीस मोठा अडथळा निर्माण होतो. अशा एकूण २०१ प्रकरणांत पोलिसांनी कारवाईचा बडगा उगारला आहे. पोलीस प्रशासनाने नागरिकांना आवाहन केले आहे की, त्यांनी आपली चारचाकी किंवा दुचाकी वाहने अधिकृत पार्किंगच्या ठिकाणीच उभी करावीत. रस्ते आणि पदपथांवर अतिक्रमण करू नये, सिग्नलचे पालन करावे आणि पोलीस प्रशासनास सहकार्य करावे.
ही कारवाई पोलीस अधीक्षक अबिनाश कुमार, अप्पर पोलीस अधीक्षक सुरज गुरव यांच्या मार्गदर्शनाखाली शहर वाहतूक शाखा वजीराबादच्या अधिकारी व अंमलदारांनी यशस्वीपणे पार पाडली. नियमांचे उल्लंघन करणाऱ्यांविरोधात यापुढेही मोटार वाहन कायद्यांतर्गत कडक कारवाई सुरूच राहील, असा इशारा प्रशासनाने दिला आहे.
प्रतिनिधी: माधव वाघमारे
