नांदेड पोलिस भाग्यनगर ट्रिपल मर्डर प्रकरणातील मुख्य आरोपीला उत्तर प्रदेशातून ठोकल्या बेड्या

नांदेड २४ एप्रिल प्रतिनिधी

शहरात खळबळ माजवून देणाऱ्या भाग्यनगर पोलीस स्टेशन हद्दीतील ट्रिपल मर्डर प्रकरणातील मुख्य आरोपीसह अन्य एका साथीदाराला जेरबंद करण्यात स्थानिक गुन्हे शाखेला (LCB) मोठे यश आले आहे. गेल्या अनेक दिवसांपासून फरार असलेल्या या आरोपींना थेट उत्तर प्रदेशातील वाराणसी येथून शिताफीने ताब्यात घेण्यात आले.

नेमकी घटना काय होती?

दिनांक ४ एप्रिल २०२६ रोजी रात्री १:१० ते १:३० च्या सुमारास कॅनॉल रोडवरील ईस्केअरजवळ ही धक्कादायक घटना घडली होती. जुन्या वादाचे पर्यावसान हाणामारीत होऊन प्रफुल उर्फ अर्जितसिंग गजानन चव्हाण यांची चाकू आणि तलवारीने वार करून निर्घृण हत्या करण्यात आली होती. या घटनेनंतर मुख्य आरोपी फरार झाले होते, ज्यांचा शोध घेण्याचे मोठे आव्हान पोलिसांसमोर होते.

वाराणसीत रचला सापळा

पोलीस अधीक्षक अविनाश कुमार यांनी या प्रकरणाचे गांभीर्य ओळखून स्थानिक गुन्हे शाखेला समांतर तपासाचे आदेश दिले होते. आरोपींचा शोध घेण्यासाठी सोलापूर, पुणे आणि इतर जिल्ह्यांत पथके रवाना करण्यात आली होती. यादरम्यान, सपोनि सुनील भिसे यांना गोपनीय माहिती मिळाली की आरोपी उत्तर प्रदेशातील वाराणसी येथे लपले आहेत.
वरिष्ठांच्या मार्गदर्शनाखाली पोलीस पथक तातडीने वाराणसीला पोहोचले. तेथे आरोपी आपले अस्तित्व लपवून आणि मोबाईल बंद करून पळून जाण्याच्या तयारीत असतानाच, स्थानिक पोलिसांच्या मदतीने त्यांना घेरण्यात आले.

अटक करण्यात आलेले आरोपी:

१. साई उर्फ साईलाला दिपकसिंग गहेरवार (वय २६ वर्ष, रा. सिडको, नांदेड) – मुख्य आरोपी.
२. नितेश परमेश्वर इंगळे (वय २२ वर्ष, रा. शिवनगर, महाराणा प्रताप चौक, नांदेड).
सोशल मीडियावर मुख्य आरोपीने सरेंडर केल्याच्या अफवा पसरल्या होत्या, मात्र प्रत्यक्षात पोलिसांनी तांत्रिक मदतीच्या आधारे पाठलाग करून त्यांना पकडले आहे.

तपास पथकाचे कौतुक

ही धाडसी कारवाई पोलीस अधीक्षक अबिनाश कुमार, अप्पर पोलीस अधीक्षक अर्चना पाटील (भोकर), आणि अप्पर पोलीस अधीक्षक सुरज गुरव यांच्या मार्गदर्शनाखाली पोलीस निरीक्षक उदय खंडेराय, सपोनि सुनील भिसे आणि त्यांच्या पथकाने यशस्वीरित्या पार पाडली. या कामगिरीबद्दल वाराणसी पोलीस अधीक्षकांनीही नांदेड पोलिसांचे अभिनंदन केले असून, नांदेड पोलीस अधीक्षकांमार्फत वाराणसी पोलिसांना प्रशंसापत्र पाठवण्यात येणार आहे.
आरोपींना पुढील कारवाईसाठी भाग्यनगर पोलिसांच्या स्वाधीन करण्यात आले आहे.
बातमी: प्रतिनिधी माधव वाघमारे