नांदेड ११ मे प्रतिनिधी
नांदेड जिल्ह्यात वाढत्या गुन्हेगारीवर अंकुश मिळवण्यासाठी पोलीस अधीक्षक अबिनाश कुमार यांच्या मार्गदर्शनाखाली ‘ऑपरेशन क्रॅक डाऊन’ राबवले जात आहे. या मोहिमेअंतर्गत नांदेड ग्रामीण पोलिसांनी धडक कारवाई करत, विनापरवाना जीवघेणी शस्त्रे बाळगणाऱ्या तीन इसमांना अटक केली आहे. त्यांच्याकडून दोन लोखंडी धारदार खंजर जप्त करण्यात आले आहेत.
गुप्त माहितीवरून सापळा
नांदेड ग्रामीण पोलीस ठाण्याच्या पथकाला १० मे रोजी गोपनीय माहिती मिळाली होती की, शहरात काही तरुण बेकायदेशीररीत्या शस्त्रे घेऊन वावरत आहेत. या माहितीच्या आधारे पोलिसांनी सूर्या गार्डन कमानीसमोर आणि चंदासिंग कॉर्नर परिसरात सापळा लावून संशयितांना ताब्यात घेतले.
अटक करण्यात आलेले आरोपी
पोलिसांनी या कारवाईत खालील तिघांवर गुन्हे दाखल केले आहेत:
१) अमोल संजय वाघमारे (वय २१ वर्ष, रा. बडारगल्ली, इतवारा, नांदेड)
२) जसिंदरसिंग रामसिंग दुधानीया (वय ३७ वर्ष, रा. विवेक नगर, अर्धापूर ह.मु. चंदासिंग कॉर्नर, नांदेड)
३) शेख आयन ऊर्फ आयन मार्क (रा. देगलूर नाका, नांदेड)
सोशल मीडियावरील फोटो ठरला पुरावा
विशेष म्हणजे, आरोपी शेख आयन याने स्वतःच्या ताब्यात बेकायदेशीर खंजर बाळगून त्याचे फोटो काढले होते आणि ते ‘sajjad bhatti k’ या इन्स्टाग्राम अकाऊंटवर अपलोड केले होते. तांत्रिक तपासाच्या आधारे पोलिसांनी या गुन्ह्याचा छडा लावला.
वरिष्ठ अधिकाऱ्यांच्या मार्गदर्शनाखाली कारवाई
ही यशस्वी कारवाई पोलीस अधीक्षक अबिनाश कुमार, अप्पर पोलीस अधीक्षक अर्चना पाटील (भोकर), अप्पर पोलीस अधीक्षक सुरज गुरव, आणि उपविभागीय पोलीस अधिकारी प्रशांत शिंदे यांच्या मार्गदर्शनाखाली पार पडली.
नांदेड ग्रामीणचे पोलीस निरीक्षक ओमकांत चिंचोलकर, पोलीस उपनिरीक्षक व्यंकट कुसमे, ज्ञानेश्वर मिटवाड, बाबूराव चव्हाण आणि त्यांच्या पथकाने ही कामगिरी केली. या कामगिरीबद्दल पोलीस अधीक्षकांनी पथकाचे कौतुक केले आहे.
वृत्त संकलन:
प्रतिनिधी, माधव वाघमारे
