नांदेड ११ मे प्रतिनिधी
जिल्ह्यातील अवैध व्यवसायांचे समूळ उच्चाटन करण्यासाठी पोलीस दलाने कंबर कसली आहे. पोलीस अधीक्षक अभिनव कुमार यांच्या नेतृत्वाखाली आज, ११ मे २०२६ रोजी संपूर्ण जिल्ह्यात ‘ऑपरेशन क्रॅकडाऊन’ राबवण्यात आले. या मोहिमेत अवैध दारू, जुगार आणि गोवंश वाहतूक करणाऱ्यांविरोधात मोठी कारवाई करत पोलिसांनी ५ लाख २ हजार १० रुपयांचा मुद्देमाल जप्त केला आहे.
एकाच वेळी ८२ गुन्हे दाखल, ९४ आरोपींवर कारवाई
जिल्ह्यात अवैध व्यवसायांना पायबंद घालण्यासाठी पोलीस अधीक्षकांनी ‘मास रेड’ (सांघिक छापे) टाकण्याचे आदेश दिले होते. या मोहिमेदरम्यान स्थानिक गुन्हे शाखा आणि जिल्ह्यातील सर्व पोलीस स्टेशनच्या पथकांनी विविध ठिकाणी धाडी टाकल्या. यामध्ये एकूण ८२ गुन्हे दाखल करण्यात आले असून ९४ आरोपींना ताब्यात घेऊन त्यांच्यावर कायदेशीर कारवाई करण्यात आली आहे.
वरिष्ठ अधिकाऱ्यांच्या मार्गदर्शनाखाली मोहीम
ही धडक कारवाई पोलीस अधीक्षक मा. श्री. अबिनाश कुमार यांच्या मार्गदर्शनाखाली पार पडली. या मोहिमेत अप्पर पोलीस अधीक्षक (भोकर) मा. श्रीमती अर्चना पाटील, अप्पर पोलीस अधीक्षक (नांदेड) मा. श्री. सूरज गुरव, तसेच सर्व उपविभागीय पोलीस अधिकारी, स्थानिक गुन्हे शाखेचे अधिकारी, कर्मचारी आणि सर्व पोलीस ठाण्यांचे प्रभारी अधिकारी यांनी सक्रिय सहभाग नोंदवला.
कारवाईचा तपशील:
- लक्ष्य: अवैध गावठी दारू निर्मिती व विक्री, जुगार अड्डे आणि गोवंश तस्करी.
- जप्त मुद्देमाल: ५,०२,०१० रुपये.
- एकूण गुन्हे: ८२.
- एकूण आरोपी: ९४.
जिल्ह्यातील अवैध व्यवसाय पूर्णतः बंद होईपर्यंत अशा प्रकारच्या कारवाया सुरूच राहतील, असा इशारा पोलीस प्रशासनाने दिला आहे. या धडक कारवाईमुळे अवैध धंदे करणाऱ्यांचे धाबे दणाणले आहेत.
वृत्त संकलन:
प्रतिनिधी माधव वाघमारे, नांदेड
