नांदेड ग्रामीण पोलिसांचा जुगार अड्ड्यांवर सर्जिकल स्ट्राईक ऑपरेशन क्रॅक डाऊन अंतर्गत ७ आरोपी जेरबंद

नांदेड १२ मे प्रतिनिधी
जिल्हा पोलीस अधीक्षक अबिनाश कुमार यांच्या मार्गदर्शनाखाली नांदेड जिल्ह्यात अवैध धंद्यांविरुद्ध ‘ऑपरेशन क्रॅक डाऊन’ ही विशेष मोहीम तीव्र करण्यात आली आहे. या मोहिमेअंतर्गत नांदेड ग्रामीण पोलिसांनी ११ मे रोजी वेगवेगळ्या तीन ठिकाणी धाडी टाकून जुगार खेळणाऱ्या ७ आरोपींना अटक केली असून, त्यांच्याकडून एकूण ४ लाख २६ हजार ७६० रुपयांचा मुद्देमाल जप्त केला आहे.

गोपनीय माहितीवरून पोलिसांची जाळी

नांदेड ग्रामीण पोलीस ठाण्याच्या हद्दीत अवैध जुगार सुरू असल्याची गोपनीय माहिती पोलीस पथकाला मिळाली होती. या माहितीच्या आधारे पोलिसांनी मिलत नगर, हमीदिया कॉलनी आणि तुप्पा परिसरातील स्मशानभूमीजवळ सापळा रचला.

ठिकाणानुसार झालेली कारवाई:

१. मिलत नगर: राफाई इलेक्ट्रॉनिक्सच्या बाजूला फिरोज पठाण छोटू पठाण (वय ४०) याला मटका जुगाराचे साहित्य आणि रोख रकमेसह पकडण्यात आले.
२. हमीदिया कॉलनी: डबल पुलाजवळ सय्यद फारुख सय्यद मजीद (वय ४४) याच्यावर कारवाई करण्यात आली.
३. तुप्पा परिसर: स्मशानभूमीजवळ दत्ता मरीबा गायकवाड, विशाल ईश्वर कंधारे, रमेश रामकिशन पारधे, फकीर शंकर हिंगडे आणि विठ्ठल संभाजी जाधव या पाच जणांना जुगार खेळताना रंगेहात पकडण्यात आले.

मोठा मुद्देमाल जप्त

या तिन्ही कारवायांमध्ये पोलिसांनी मटका जुगाराचे साहित्य, रोख रक्कम, मोबाईल फोन आणि मोटार सायकली असा एकूण ४,२६,७६०/- रुपयांचा मुद्देमाल जप्त केला आहे. याप्रकरणी नांदेड ग्रामीण पोलीस ठाण्यात महाराष्ट्र जुगार प्रतिबंध अधिनियम १८८७ च्या कलम १२(अ) नुसार तीन स्वतंत्र गुन्हे दाखल करण्यात आले आहेत.

वरिष्ठांचे मार्गदर्शन व पथक

ही यशस्वी कारवाई पोलीस अधीक्षक अबिनाश कुमार, अप्पर पोलीस अधीक्षक अर्चना पाटील (भोकर), अपर पोलीस अधीक्षक सुरज गुरव (नांदेड) आणि उपविभागीय पोलीस अधिकारी प्रशांत शिंदे यांच्या मार्गदर्शनाखाली करण्यात आली.
या मोहिमेत पोलीस निरीक्षक ओमकांत चिंचोलकर, पोलीस उपनिरीक्षक व्यंकट कुसमे, पोहेकॉ वसंत केंद्रे, विनोद पवार, शंकर माळगे, समीर अहमद, धम्मपाल कांबळे, सचिन चावरे आणि इतर कर्मचाऱ्यांच्या पथकाने सहभाग घेतला.

मागील तीन दिवसांत १८ आरोपींना अटक
ऑपरेशन क्रॅक डाऊन अंतर्गत नांदेड ग्रामीण पोलिसांनी गेल्या तीन दिवसांत एकूण पाच कारवाया केल्या असून, त्यात १८ आरोपींकडून १० लाख ३५ हजार ४०० रुपयांचा मुद्देमाल जप्त करण्यात आला आहे.

पोलीस अधीक्षकांनी या धडक कामगिरीबद्दल पोलीस अधिकारी व अंमलदारांचे विशेष कौतुक केले आहे.
वृत्त संकलन
प्रतिनिधी, माधव वाघमारे.