अवैध रेती उपसा करणारे १० रेती माफिया गजाआड २ कोटी १५ लाखांचा मुद्देमाल जप्त

नांदेड १ जून प्रतिनिधी
जिल्ह्यात अवैध गौण खनिज उपसा आणि वाहतूक करणाऱ्यांविरुद्ध पोलिसांनी कडक पावले उचलली आहेत. पोलीस अधीक्षक अविनाश कुमार यांच्या मार्गदर्शनाखाली ‘ऑपरेशन क्रॅक डाऊन’ अंतर्गत नांदेड ग्रामीण पोलिसांनी एका मोठ्या कारवाईत गोदावरी नदी पात्रातून अवैध रेती उपसा करणाऱ्या १० रेती माफियांवर गुन्हा दाखल केला आहे. या कारवाईत पोलिसांनी तब्बल २ कोटी १५ लाख ६५ हजार रुपयांचा मुद्देमाल जप्त केला असून यामुळे रेती माफियांचे धाबे दणाणले आहेत.

गोदावरी पात्रात मध्यरात्री छापा

पोलीस अधीक्षक अविनाश कुमार यांनी जिल्ह्यातील सर्व पोलीस ठाण्यांच्या प्रमुखांना अवैध रेती उपशावर कडक कारवाई करण्याचे आदेश दिले होते. या आदेशानुसार नांदेड ग्रामीण पोलीस स्टेशनचे पोलीस निरीक्षक ओमकांत चिंचोलकर व त्यांच्या पथकाला गंगा बेट शिवारातील गोदावरी नदी पात्रात चोरून अवैध रेती उपसा होत असल्याची गोपनीय माहिती मिळाली.
या माहितीच्या आधारे पोलिसांनी ३१ मे २०२६ रोजी रात्री १०:१० वाजेच्या सुमारास गंगाबेट शिवारात सापळा रचून छापा टाकला. या छाप्यात हायवा आणि ट्रॅक्टरच्या साहाय्याने अवैध रेती उपसा व वाहतूक करताना आरोपी रंगेहात सापडले.

२ कोटी १५ लाखांपेक्षा जास्त मुद्देमाल जप्त

या धडक कारवाईत पोलिसांनी खालील मुद्देमाल जप्त केला आहे:

हायवा गाड्या: एक टाटा कंपनीचा हायवा (क्र. MH 26CH 9400) ज्यामध्ये ५ ब्रास रेती होती (किंमत रु. ४५,२५,०००) आणि एक भारत बेंझ कंपनीचा हायवा (क्र. MH14MH8849, कीमत रु. ४५,००,०००).
ट्रॅक्टर: एक लाल व पिवळ्या रंगाचा ट्रॅक्टर व ट्रॉली (किंमत रु. ११,००,०००).
बोटी व इंजिन: दोन मोठ्या लोखंडी बोटी (किंमत रु. ३०,००,०००), दोन फायबर बोटी (किंमत रु. २०,००,०००) आणि ११ इंजिन (किंमत रु. ३३,००,०००).
रेती व इतर साहित्य: पाण्यात तरंगणारे ५२ तराफे आणि त्यावर असलेली १०४ ब्रास रेती (किंमत रु. ३१,२०,०००) तसेच अंदाजे ४ ब्रास रेती (किंमत रु. ८०,०००).
पोलिसांनी घटनास्थळावरून एकूण २,१५,६५,०००/- रुपयांचा माल जप्त केला असून काही साहित्य जागीच नष्ट केले आहे.

१० जणांवर गुन्हा दाखल

या प्रकरणी नांदेड ग्रामीण पोलीस ठाण्यात पोकों/२१५९ हनमंत उत्तमराव तेलंग यांच्या फिर्यादीवरून गुन्हा दाखल करण्यात आला आहे. आरोपींमध्ये बालाजी अशोक सांगळे (रा. बामणी), बळीराम गोवर्धन चव्हाण (रा. लिंबोटी तांडा), अशोक मोरे (रा. सोनखेड), अतुल प्रभाकर गच्चे (रा. जवळा) आणि इतर ६ अनोळखी इसमांचा समावेश आहे.
सर्व आरोपींविरुद्ध भारतीय न्याय संहितेच्या कलम ३०३(२), ३(५) सहकलम ४८(७), ४८(८) महाराष्ट्र जमीन महसूल अधिनियम आणि पर्यावरण संरक्षण अधिनियम कलम ९, १५ प्रमाणे गुन्हा नोंदवण्यात आला आहे.

वरिष्ठांचे मार्गदर्शन व कौतुक

ही धडक कारवाई पोलीस अधीक्षक अबिनाश कुमार, अपर पोलीस अधीक्षक (भोकर) श्रीमती अर्चना पाटील, अपर पोलीस अधीक्षक (नांदेड) सुरज गुरव, आणि उपविभागीय पोलीस अधिकारी (इतवारा) प्रशांत शिंदे यांच्या मार्गदर्शनाखाली करण्यात आली.
कारवाईत यशस्वी कामगिरी बजावणाऱ्या पोलीस निरीक्षक ओमकांत चिंचोलकर, पोउपनि बाबुराव चव्हाण, पोहेकॉ/अर्जुन मुंडे, पोकों/संतोष पवार, पोकों/शेख असीफ, पोकों/गवेद्र सिरमलवार, पोकों/विष्णु कल्याणकर, पोकों/शेख जमीर आणि पोकों/शिरगिरे यांचे पोलीस अधीक्षकांनी विशेष कौतुक केले आहे.