नांदेड १८ जून ( प्रतिनिधी माधव वाघमारे)
नांदेड जिल्ह्यातील मरखेल पोलीस ठाण्याच्या हद्दीत गेल्या दोन महिन्यांपासून बेपत्ता असलेल्या एका व्यक्तीचा अत्यंत निर्घृणपणे खून झाल्याची धक्कादायक घटना उघडकीस आली आहे. मरखेल पोलिसांनी अत्यंत व्यावसायिक, तांत्रिक आणि चिकाटीच्या तपासाच्या जोरावर कोणत्याही पुराव्याशिवाय असलेल्या या ‘अंध खुनाचा’ (Blind Murder) यशस्वी उलगडा केला असून, मृतदेहाचे अवशेष हस्तगत करत आरोपी पत्नी आणि तिच्या प्रियकराला अटक केली आहे.
मिसिंग तक्रार आणि पोलिसांचा संशय
रामकिशन गंगाधर गोलेवार (रा. आमदापूर, ता. देगलूर, जि. नांदेड) हे २५ एप्रिल २०२६ पासून बेपत्ता असल्याची माहिती त्यांची पत्नी सौ. दैवशाला रामकिशन गोलेवार हिने १७ मे २०२६ रोजी मरखेल पोलीस ठाण्यात दिली होती. सुरुवातीला पोलिसांनी मिसिंग क्रमांक ०६/२०२६ नुसार गुन्हा दाखल केला. मात्र, पती बेपत्ता झाल्याची माहिती तब्बल २५ दिवस उशिराने देणे आणि दैवशाला हिच्याकडून पतीचा शोध घेण्यासाठी कोणताही अपेक्षित प्रयत्न न होणे, यामुळे पोलिसांचा संशय बळावला.
मोबाईल कॉल डिटेल्स (CDR) मुळे फुटले बंड
तपास पथकाने या प्रकरणाकडे केवळ मिसिंग म्हणून न पाहता सखोल तपास सुरू केला. गावातील चौकशीदरम्यान दैवशाला हिचे गावातीलच सुभाष व्यंकन्ना यत्तरवाड याच्याशी अनैतिक संबंध असल्याची माहिती पोलिसांना मिळाली. पोलिसांनी दोघांचे मोबाईल कॉल डिटेल्स रेकॉर्ड (CDR) मिळवून त्याचे विश्लेषण केले असता, दोघेही रोज मोठ्या प्रमाणात संपर्कात असल्याचे समोर आले. विशेष म्हणजे, पती मिसिंग झाल्याची तक्रार केल्यानंतर त्यांच्यातील संवाद अचानक थांबला होता.
यातच आणखी एक संशयास्पद बाब समोर आली की, रामकिशन यांनी एप्रिल महिन्यापासून त्यांची पेन्शनची रक्कम काढली नव्हती. पोलिसांनी दैवशाला हिला चौकशीसाठी बोलावले असता तिने सुरुवातीला उडवाउडवीची उत्तरे दिली.
शेतात पुरला होता मृतदेह; आरोपींनी दिली कबुली
पोलिसांनी तांत्रिक पुरावे, साक्षीदारांचे जबाब आणि संशयास्पद हालचालींची मजबूत साखळी तयार करून दैवशाला हिच्यासमोर ठेवली. पोलिसांच्या कडक चौकशीपुढे अखेर तिचा धीर सुटला आणि तिने गुन्ह्याची कबुली दिली. अनैतिक संबंधात अडथळा ठरणाऱ्या पती रामकिशन गोलेवार यांचा प्रियकर सुभाष यत्तरवाड याच्या मदतीने दगडाने ठेचून खून केल्याचे तिने मान्य केले. तसेच पुरावा नष्ट करण्यासाठी मृतदेह शेतात पुरल्याचे सांगितले.
दंडाधिकाऱ्यांच्या उपस्थितीत उत्खनन
आरोपींनी दाखवलेल्या जागेवर कार्यकारी दंडाधिकारी यांच्या उपस्थितीत उत्खनन करण्यात आले. त्या ठिकाणाहून मानवी सांगाडा व इतर अवशेष हस्तगत करण्यात आले आहेत. घटनास्थळी मिळालेल्या कपड्यांवरून नातेवाईकांनी मृतदेहाची प्राथमिक ओळख पटवली असून, पुढील खात्रीसाठी मृतदेहाचे डीएनए (DNA) सॅम्पल हस्तगत करण्यात आले आहे. याप्रकरणी मरखेल पोलीस ठाण्यात गु.र.नं. १००/२०२६, भारतीय न्याय संहिता २०२३ चे कलम १०३, २३८, ३(५) अन्वये गुन्हा दाखल करण्यात आला आहे.
आरोपींना वेगवेगळ्या ठिकाणांहून अटक
- आरोपी १: दैवशाला रामकिशन गोलेवार (वय ४० वर्षे, रा. एकुर्का रोड, ता. उदगीर, ह.मु. आमदापूर, ता. देगलूर) हिला आमदापूर येथून ताब्यात घेण्यात आले.
- आरोपी २: सुभाष व्यंकन्ना यत्तरवाड (वय ४५ वर्षे, रा. आमदापूर, ता. देगलूर). गुन्हा केल्यानंतर तो पसार झाला होता, त्याला तांत्रिक माहितीच्या आधारे भाईंदरपाडा नागलाबंदर ठाणे, मुंबई येथून ताब्यात घेऊन अटक करण्यात आली आहे.
तपासातील ठळक बाबी आणि वैशिष्ट्ये:
- कोणतीही तातडीची माहिती किंवा मृतदेह उपलब्ध नसताना केवळ संशयास्पद परिस्थितीवरून तपास पुढे नेण्यात यश आले.
- तांत्रिक तपास (CDR Analysis) आणि मैदानी पोलीस यंत्रणा (Ground Intelligence & Field Policing) यांचा प्रभावी संगम पाहायला मिळाला.
- गुन्ह्यात वापरलेले हत्यार (दगड), मयताचे कपडे आणि डीएनए सॅम्पल जप्त करून पुराव्यांची भक्कम साखळी तयार करण्यात आली आहे.
या पथकाने केली कामगिरी:
सदरची यशस्वी कामगिरी पोलीस अधीक्षक मा. श्री. अबिनाश कुमार, अपर पोलीस अधीक्षक (भोकर) मा. श्रीमती अर्चना पाटील, अपर पोलीस अधीक्षक (नांदेड) मा. श्री. सुरज गुरव, आणि उपविभागीय पोलीस अधिकारी (देगलूर) मा. श्री. संकेत गोसावी यांच्या मार्गदर्शनाखाली मरखेल पोलीस ठाण्याचे सपोनि श्री. रवी हुंडेकर, पोलीस उपनिरीक्षक श्री. विलास पवार, पो.हे.कॉ. परशुराम इंगोले, पो.कॉ. सचिन गिरे, पो.कॉ. नारायण यंगाले, पो.कॉ. परमेश्वर बेलकर, पो.कॉ. संदीप बोदेमवाड (सर्व नेमणूक पो.स्टे. मरखेल) आणि सायबर सेल नांदेडचे पो.हे.कॉ. राजेंद्र सिटीकर यांनी केली आहे.
या उत्कृष्ट आणि कौतुकास्पद कामगिरीबद्दल पोलीस अधीक्षक मा. श्री. अबिनाश कुमार यांनी संपूर्ण तपास पथकाचे विशेष अभिनंदन केले आहे.
