नांदेड २१ जून प्रतिनिधी
नांदेड शहरातील सार्वजनिक ठिकाणी शांततेचा भंग करणाऱ्या आणि दारू पिऊन हुल्लडबाजी करणाऱ्यांवर नांदेड पोलिसांनी जोरदार बडगा उगारला आहे. पोलीस अधीक्षक मा. श्री. अबिनाश कुमार यांच्या मार्गदर्शनाखाली सुरू असलेल्या ‘सिटी स्ट्रीट सेफ्टी ड्राईव्ह’ अंतर्गत एकाच दिवशी तब्बल १६ जणांवर महाराष्ट्र पोलीस कायदा कलम ११०/११७ अन्वये धडक कारवाई करण्यात आली आहे. या कारवाईमुळे सार्वजनिक ठिकाणी उपद्रव करणाऱ्यांमध्ये एकच खळबळ उडाली आहे.
पोलीस अधीक्षक मा. श्री. अबिनाश कुमार आणि अप्पर पोलीस अधीक्षक मा. श्री. सुरज गुरव यांच्या सूचनेनुसार, पथक प्रमुख सपोनि श्री. एन. जी. पोमनाळकर व चार्ली पोलीस अंमलदार यांच्या पथकाने २० जून २०२६ रोजी नांदेड शहरात ही धडक मोहीम राबवली.
विविध भागात झालेली कारवाई खालीलप्रमाणे
- भाग्यनगर परिसर (०७ इसमांवर कारवाई)
सिटी स्ट्रीट सेफ्टी ड्राईव्ह पथकातील चार्ली क्रमांक १ आणि ३ मधील पोलीस अंमलदार व बिट मार्शल पेट्रोलिंगवर असताना त्यांना छत्रपती चौक, सम्राट चौक आणि सत्कार वाईन शॉप परिसरात ७ जण मद्यप्राशन करून सार्वजनिक शांततेचा भंग करताना आढळून आले. त्यांच्यावर तातडीने कायदेशीर कारवाई करण्यात आली. तसेच परिसरातील वाईन शॉप, हॉटेल्स, शाळा आणि कॉलेज परिसराचीही तपासणी करण्यात आली. - नांदेड ग्रामीण (०१ इसमावर कारवाई)
चार्ली क्रमांक २ च्या पथकाने पेट्रोलिंग दरम्यान गोपाळ चावडी येथे दारू पिऊन गोंधळ घालणाऱ्या एका इसमाला ताब्यात घेऊन त्याच्यावर कलम ११०/११७ अन्वये कारवाई केली. - इतवारा भाग (०१ इसमावर कारवाई)
जुना मोंढा परिसरात पेट्रोलिंग सुरू असताना सार्वजनिक शांततेचा भंग करणाऱ्या एका मद्यपीवर चार्ली क्रमांक २ च्या पथकाने कारवाईचा बडगा उगारला. - दामिनी पथकाची कारवाई (०८ इसमांवर कारवाई)
महिला व नागरिकांच्या सुरक्षेसाठी सदैव तत्पर असलेल्या दामिनी पथकाने विसावा गार्डन आणि महात्मा फुले शाळा समोर आरडाओरड करून शांतता भंग करणाऱ्या ८ जणांना रंगेहात पकडले. या सर्वांवर शिवाजीनगर पोलीस ठाण्यात मपोका अन्वये गुन्हे दाखल करण्यात आले आहेत.
वाईन शॉप आणि शैक्षणिक संस्थांची तपासणी
या मोहिमेदरम्यान केवळ हुल्लडबाजांवर कारवाई करून पोलीस थांबले नाहीत, तर शहरातील विविध भागातील दारूची दुकाने, वाईन शॉप, हॉटेल्स, तसेच शाळा, कॉलेज आणि कोचिंग क्लासेसच्या परिसराला भेटी देऊन कडक तपासणी करण्यात आली.
पोलीस अधीक्षकांचा कडक इशारा
“नांदेड शहरात कोणीही सार्वजनिक ठिकाणी दारू पिऊ नये, तसेच दारू पिणाऱ्यांसाठी जागा उपलब्ध करून देऊ नये. सार्वजनिक शांततेचा भंग करणाऱ्यांची गय केली जाणार नाही. असे कृत्य करणाऱ्यांवर यापुढेही अत्यंत कडक कारवाई केली जाईल असा सज्जड इशारा पोलीस अधीक्षक मा. श्री. अबिनाश कुमार यांनी नागरिकांना व व्यावसायिक चालकांना दिला आहे.
– विशेष बातमी प्रतिनिधी: माधव वाघमारे (नांदेड)
