नांदेड २० जून (विशेष प्रतिनिधी)
नांदेड शहरातील चोऱ्या आणि शरीराविरुद्धच्या गुन्ह्यांना आळा घालण्या साठी पोलीस प्रशासनाने कंबर कसली आहे. पोलीस अधीक्षक यांच्या मार्गदर्शनाखाली शहरात ‘ऑपरेशन फ्लश आऊट’ (Operation Flush Out) अंतर्गत धडक कारवाई सुरू करण्यात आली आहे. याच मोहिमेचा भाग म्हणून काल मध्यरात्री नांदेड शहरामध्ये सराईत गुन्हेगारांची झाडाझडती घेण्यासाठी एकाच वेळी व्यापक ‘कोम्बिंग ऑपरेशन’ राबवण्यात आले,
मध्यरात्री ४ तास कोम्बिंग ऑपरेशन
दिनांक १९ जून २०२६ रोजी रात्री २३:०० वाजल्यापासून ते २० जून २०२६ च्या पहाटे ०३:०० वाजेपर्यंत (एकूण ४ तास) पोलीस अधीक्षक श्री. अविनाश कुमार यांच्या नेतृत्वात हे ऑपरेशन राबवण्यात आले. शहरातील सराईत गुन्हेगारांचे रेकॉर्ड आणि हालचाली चेक करून त्यांच्यावर कडक कारवाई करणे हा या मोहिमेचा मुख्य उद्देश होता.
वरिष्ठ अधिकाऱ्यांसह मोठा फौजफाटा मैदानात
या धडक कोम्बिंग ऑपरेशनमध्ये अप्पर पोलीस अधीक्षक भोकर, उपविभागीय पोलीस अधिकारी (उपविभाग नांदेड शहर, भोकर, धर्माबाद, देगलूर, कंधार), स्थानिक गुन्हे शाखा (LCB) नांदेड येथील पोलीस निरीक्षक, इतर अधिकारी व अंमलदार तसेच नांदेड शहरातील सर्व पोलीस ठाण्यांचे प्रभारी अधिकारी, दुय्यम अधिकारी, अंमलदार आणि आरसीपी (RCP) पथकाने मोठ्या संख्येने सहभाग घेतला होता. या मोहिमेत एकूण ३१ पोलीस अधिकारी आणि १२८ पोलीस अंमलदार रस्त्यावर उतरले होते.
गुन्हेगारांची झाडाझडती आणि कारवाईची आकडेवारी:
४ तासांच्या या मोहिमेदरम्यान मालमत्तेविरुद्ध व शरीराविरुद्ध गुन्हे करणारे, अवैध शस्त्र बाळगणारे, हद्दपार/तडीपार आरोपी, हिस्ट्रीशिटर्स आणि फरार आरोपींची कसून तपासणी करण्यात आली. कारवाईची आकडेवारी खालीलप्रमाणे आहे:
- तडीपार गुन्हेगार चेकिंग: कलम ५५, ५६ मधील २३ तडीपार गुन्हेगार चेक करण्यात आले.
- MPDA अंतर्गत सुटलेले गुन्हेगार: २१ गुन्हेगारांची तपासणी झाली.
- शरीराविरुद्धचे सराईत गुन्हेगार: मालमत्ता व शरीराविरुद्धचे ४७ सराईत गुन्हेगार चेक केले गेले.
- आर्म्स ॲक्ट व मपोका कारवाई: आर्म्स ॲक्ट अंतर्गत एका गुन्हेगाराला चेक करून गुन्हा दाखल करण्यात आला, तर कलम १२२ मपोका अन्वये ५ गुन्हे दाखल झाले.
- वॉरण्ट बजावणी: १२ जामीनपात्र (BW) आणि ०७ अजामीनपात्र (NBW) वॉरण्ट बजावण्यात आले.
- समन्स बजावणी: ०५ समन्सची बजावणी करण्यात आली.
विविध पोलीस ठाण्यांतर्गत दाखल झालेले गुन्हे:
कोम्बिंग ऑपरेशनदरम्यान शहरातील विविध पोलीस ठाण्यांमध्ये एकूण ६ महत्त्वाचे गुन्हे दाखल करून आरोपींना ताब्यात घेण्यात आले:
१. स्थानिक गुन्हे शाखा (स्थागुशा): आर्म्स ॲक्ट कलम ४/२५ अन्वये बेकायदेशीर शस्त्र बाळगल्याप्रकरणी ०१ आरोपीविरुद्ध गुन्हा दाखल.
२. वजिराबाद पोलीस ठाणे: कलम १२२ म.पो.का. अन्वये २ स्वतंत्र गुन्हे दाखल करून एकूण ०२ आरोपींवर कारवाई.
३. विमानतळ पोलीस ठाणे: कलम १२२ मपोका अन्वये गुन्हा दाखल, ०२ आरोपींना ताब्यात घेतले.
४. इतवारा पोलीस ठाणे: कलम १२२ मपोका अन्वये ०१ आरोपीवर कारवाई.
५. भाग्यनगर पोलीस ठाणे: कलम १२२ मपोका अन्वये गुन्हा दाखल करून ०२ आरोपींवर कारवाई.
पोलीस प्रशासनाच्या या अचानक आणि रात्रीच्या वेळी झालेल्या मोठ्या कारवाईमुळे नांदेड शहरातील गुन्हेगारी वर्तुळात प्रचंड खळबळ उडाली असून, नागरिकांमधून मात्र या सुरक्षिततेच्या पावलाचे स्वागत होत आहे. आगामी काळातही अशीच कडक मोहीम सुरू राहणार असल्याचे संकेत पोलीस प्रशासनाने दिले आहेत.
– बातमी प्रतिनिधी: माधव वाघमारे
