नांदेड ६ जुलै प्रतिनिधी
नांदेड वाघाळा शहर महानगरपालिकेच्या वतीने महान तत्त्वज्ञ, संत वाङ्मयाचे गाढे अभ्यासक आणि प्रज्ञाचक्षू ‘संत गुलाबराव महाराज’ यांच्या जयंतीनिमित्त आज, सोमवार दिनांक ०६ जुलै २०२६ रोजी सकाळी ११.०० वाजता महानगरपालिकेच्या मुख्य प्रशासकीय इमारतीमध्ये त्यांच्या प्रतिमेस पुष्पहार अर्पण करून भावपूर्ण अभिवादन करण्यात आले. महानगरपालिकेच्या महापौर सौ. कविता संतोष मुळे आणि पालिका आयुक्त डॉ. महेशकुमार डोईफोडे यांच्या हस्ते प्रतिमेचे पूजन करण्यात आले.
अध्यात्म आणि विज्ञानाची सांगड घालणारा विचार प्रेरणादायी
संत गुलाबराव महाराज हे विसाव्या शतकातील महाराष्ट्रातील एक अत्यंत अलौकिक, प्रज्ञाचक्षू संत, थोर तत्त्वज्ञ आणि महान मराठी लेखक होते. वयाच्या अवघ्या नवव्या महिन्यात दृष्टी गेल्यानंतरही त्यांनी आपल्या अंतर्दृष्टीने वेद, उपनिषदे, तत्त्वज्ञान, विज्ञान आणि संगीत अशा विविध क्षेत्रांवर तब्बल १३० पेक्षा जास्त ग्रंथांची रचना केली.
अवघ्या ३४ वर्षांचे अल्प आयुष्य लाभलेल्या या संताला वारकरी संप्रदायात आणि विद्वानांमध्ये अत्यंत आदराचे स्थान आहे. त्यांनी शेकडो ग्रंथांची निर्मिती करून समाजाला अध्यात्म आणि विज्ञानाची सांगड घालणारा एक नवा व पुरोगामी विचार दिला. त्यांचा हाच विचार आणि वारसा आजच्या पिढीसाठी अत्यंत प्रेरणादायी असल्याचे या प्रसंगी मान्यवरांनी सांगितले.
अभिवादन प्रसंगी मान्यवरांची उपस्थिती
या गरिमामयी सोहळ्याप्रसंगी महानगरपालिकेचे स्थायी समिती सभापती विरेंद्रसिंघ गाडीवाले, महिला बाल कल्याण सभापती सदिच्छा सोनी पाटील, उपसभापती निरंजना लांडगे, गट नेते संदिपसिंग गाडीवाले, साबेर चाऊस, अतिरिक्त आयुक्त गिरीश कदम, उपायुक्त अभिजीत वायकोस, उपायुक्त स. अजितपालसिंघ संधु आणि सहाय्यक आयुक्त मो. गुलाम सादिक प्रामुख्याने उपस्थित होते.
या राजकीय व प्रशासकीय अधिकार्यांसह महानगरपालिकेचे कर्मचारी मोठ्या संख्येने उपस्थित होते. उपस्थित सर्वांनी संत गुलाबराव महाराज यांच्या प्रतिमेचे दर्शन घेऊन त्यांच्या स्मृतीस आदरांजली वाहिली.
– प्रतिनिधी, माधव वाघमारे.
