नांदेड ६ जुलै ( प्रतिनिधी माधव वाघमारे)
नांदेड शहरातील कायदा व सुव्यवस्था अबाधित राखण्यासाठी पोलीस अधीक्षक डॉ. नीलाभ रोहन यांच्या मार्गदर्शनाखाली सध्या विशेष मोहीम राबवली जात आहे. या मोहिमेदरम्यान पोलीस स्टेशन इतवारा येथील गुन्हे शोध पथकाने रविवारी रात्री एका धारदार शस्त्र बाळगणाऱ्या युवकाविरुद्ध यशस्वी कारवाई करून त्याला बेड्या ठोकल्या आहेत.
मिळालेल्या माहितीनुसार, ५ जुलै २०२६ रोजी रात्री ९:५० वाजण्याच्या सुमारास इतवारा पोलीस ठाण्याच्या गुन्हे शोध पथकाला एक गोपनीय माहिती मिळाली. हैदरबाग पाण्याच्या टाकीजवळ एक तरुण हातात तलवार घेऊन संशयास्पद रित्या फिरत असून तो परिसरात दहशत निर्माण करण्याच्या तयारीत असल्याची माहिती मिळताच, पोलिसांनी पंचांसमक्ष तात्काळ त्या ठिकाणी छापा टाकला.
२० वर्षीय तरुण जेरबंद, ५०० रुपये किमतीची तलवार जप्त
पोलिसांनी केलेल्या या छाप्यात संशयित आरोपी तमजीद खान अब्बास खान (वय २० वर्षे, रा. पीरनगर, ह.मु. मिल्लत नगर, नांदेड) याला जागीच ताब्यात घेतले. त्याची अंगझडती घेतली असता, त्याच्याकडे सुमारे ३३ इंच लांबीची लोखंडी धारदार तलवार आढळून आली. पोलिसांनी अंदाजे ५०० रुपये किमतीची सदर तलवार जप्त केली असून आरोपीला अटक केली आहे.
याप्रकरणी आरोपीविरुद्ध पोलीस स्टेशन इतवारा येथे गुन्हा रजी. नंबर २३६/२०२६ कलम ४/२५ भारतीय हत्यार कायद्यान्वये गुन्हा नोंदविण्यात आला आहे. या प्रकरणाचा पुढील तपास इतवारा पोलीस करत आहेत.
अवैध शस्त्रे बाळगणाऱ्यांवर कठोर कारवाई होणार: पोलीस प्रशासनाचे आवाहन
या कारवाईच्या पार्श्वभूमीवर नांदेड जिल्हा पोलिसांनी नागरिकांना जाहीर आवाहन केले आहे की, कोणत्याही प्रकारचे अवैध शस्त्र बाळगणे अथवा सार्वजनिक ठिकाणी त्यांचा वापर करणे हा गंभीर गुन्हा आहे. अशा कृत्यांमुळे सामाजिक शांतता धोक्यात येते. त्यामुळे नागरिकांना आपल्या परिसरात अशी कोणतीही संशयास्पद व्यक्ती किंवा अवैध शस्त्र आढळल्यास त्याची माहिती तात्काळ जवळच्या पोलीस स्टेशनला किंवा पोलीस नियंत्रण कक्षाला द्यावी, माहिती देणाऱ्याचे नाव गुप्त ठेवले जाईल. कायदा व सुव्यवस्था भंग करणाऱ्यांविरुद्ध यापुढेही अशीच कठोर कारवाई केली जाईल, असा इशारा पोलिसांनी दिला आहे.
या पथकाने केली कामगिरी
सदर यशस्वी कारवाई मा. श्री. डॉ. नीलाभ रोहन (पोलीस अधीक्षक, नांदेड), मा. श्री. सूरज गुरव (अपर पोलीस अधीक्षक, नांदेड), श्री. प्रशांत शिंदे (उपविभागीय पोलीस अधिकारी, इतवारा), श्री. खनाळ (पोलीस निरीक्षक, इतवारा) आणि श्री. संजय शिंदे (पोलीस निरीक्षक, इतवारा) यांच्या मार्गदर्शनाखाली पार पडली. प्रत्यक्ष कारवाईत गुन्हे शोध पथकाचे पोलीस उपनिरीक्षक श्री. प्रवीण आगलावे, पोलीस अंमलदार कलंदर, इसराईल आणि सुखई यांनी महत्त्वपूर्ण भूमिका बजावली.
– विशेष वृत्त प्रतिनिधी: माधव वाघमारे
