भाग्यनगर गुन्हे शोध पथकाकडून घरफोडीच्या गुन्ह्यातील ३ आरोपी जेरबंद ४.१४ लाखांचा मुद्देमाल हस्तगत

नांदेड १० जुलै ( प्रतिनिधी – माधव वाघमारे)
नांदेड शहरात गुन्हेगारांवर वचक निर्माण करणाऱ्या नांदेड पोलिसांनी पुन्हा एकदा उल्लेखनीय कामगिरी केली आहे. भाग्यनगर पोलीस ठाण्याच्या गुन्हे शोध पथकाने गोपनीय माहिती आणि तांत्रिक विश्लेषणाच्या आधारे धडक कारवाई करत घरफोडीच्या गुन्ह्यातील ३ अट्टल आरोपींना अटक केली आहे. या आरोपींकडून नगदी रकमेसह सोन्या-चांदीचे दागिने आणि गुन्ह्यात वापरलेली मोटारसायकल असा एकूण ४ लाख १४ हजार ६०० रुपयांचा मुद्देमाल जप्त करण्यात आला आहे.

अशी झाली कारवाई…

भाग्यनगर पोलीस ठाण्याचे गुन्हे शोध पथकातील पोउपनि विनोद देशमुख व त्यांचे पथक परिसरामध्ये पेट्रोलिंग करत असताना, त्यांना गुप्त बातमीदारामार्फत अत्यंत गोपनीय माहिती मिळाली. ‘श्री शाहू महाराज पुतळा’ परिसरात काही संशयित इसम फिरत असल्याची माहिती मिळताच पथकाने तातडीने सापळा रचून तीन संशयितांना ताब्यात घेतले.
त्यांची अंगझडती घेतली असता त्यांच्याकडे सोन्या-चांदीचे दागिने आणि रोख रक्कम मिळून आली. या मुद्देमालाबाबत विचारणा केली असता संशयितांना समाधानकारक उत्तर देता आले नाही. त्यामुळे भाग्यनगर पोलिसांनी सुरुवातीला कलम १२४ मपोका अन्वये प्रतिबंधात्मक कारवाई (एन.सी. क्रमांक ५०७/२०२६) केली.

खाक्या दाखवताच गुन्ह्याची कबुली!

पोलिसांनी आरोपींना विश्वासात घेऊन कसून चौकशी केली असता, त्यांनी पोलीस ठाणे शिवाजीनगर हद्दीतील नारायण नगर येथे चोरी केल्याची कबुली दिली. पोलिसांनी तातडीने नारायण नगर परिसरातील सी.सी.टी.व्ही. फुटेज तपासले व शिवाजीनगर पोलीस ठाण्यातील रेकॉर्डची पाहणी केली. तपासादरम्यान शिवाजीनगर पोलीस ठाण्यात यापूर्वीच घरफोडीचा गुन्हा (रजि. नं. २९१/२०२६, कलम ३३१(१)(२)(३)(४), ३०५ (a) बी.एन.एस.) दाखल असल्याचे समोर आले.

अटक करण्यात आलेले आरोपी:

१) विशाल सुनिल क-हाळे (वय २५ वर्षे, रा. नारायणनगर, नांदेड)
२) सुगंध संजय पाईकराव (वय २२ वर्षे, रा. तेहरानगर, नांदेड)
३) मगद मुकुंदराव वाघमारे (वय २५ वर्षे, रा. वामनदादा कर्डकनगर, नांदेड)

जप्त करण्यात आलेला मुद्देमाल:

• नगद रक्कम: २,१०,०००/- रुपये
• सोन्याचे दागिने: ४ ग्राम वजनाचे (किंमत अंदाजे ५१,५००/- रुपये)
• चांदीचे दागिने: २१ ग्राम वजनाचे (किंमत अंदाजे ३,१००/- रुपये)
• मोटारसायकल (गुन्ह्यात वापरलेली): किंमत अंदाजे १,५०,०००/- रुपये
• एकूण जप्त मुद्देमाल: ४,१४,६००/- रुपये
  आरोपींना पुढील कायदेशीर कारवाईसाठी आता शिवाजीनगर पोलिसांच्या ताब्यात देण्यात आले आहे.

या अधिकाऱ्यांच्या मार्गदर्शनाखाली झाली कामगिरी:

सदर धडक व यशस्वी कारवाई नांदेडचे पोलीस अधीक्षक श्री. नीलाभ रोहन, अप्पर पोलीस अधीक्षक श्री. सूरज गुरव, पोलीस उपअधीक्षक (शहर) रामेश्वर वैजने यांच्या मार्गदर्शनाखाली भाग्यनगरचे पोलीस निरीक्षक श्री. संतोष तांबे, पोलीस निरीक्षक (गुन्हे) श्री. महेश माळी, पोउपनि विनोद देशमुख, पोउपनि नरेश वाडेवाले, पोहेकॉ विशाल माळवे, पोकॉ विष्णूकांत मुंडे, सुधाकर मलदोडे, राजीव घुले, नागनाथ चापके, राहुल लाटकर, आदनान पठाण आणि अंकुश कांबळे या पथकाने केली आहे. पोलीस प्रशासनाच्या या धडक कामगिरीचे नागरिकांमधून कौतुक होत आहे.