नांदेड ११ जुलै ( प्रतिनिधी माधव वाघमारे)
नांदेड जिल्ह्यामध्ये अवैध धंद्यांचे समूळ उच्चाटन करण्यासाठी पोलीस प्रशासनाने कंबर कसली असून, पोलीस अधीक्षक मा. श्री डॉ. निलाभ रोहन यांच्या मार्गदर्शनाखाली जिल्हाभरात विशेष मोहीम राबवली जात आहे. याच मोहिमेअंतर्गत मुखेड पोलीस ठाण्याच्या पथकाने दोन वेगवेगळ्या ठिकाणी धडाकेबाज कारवाया करत अवैध गुटखा विक्री आणि विनापरवाना वाळूची वाहतूक करणाऱ्या तस्करांना दणका दिला आहे. या दोन्ही कारवायांमध्ये पोलिसांमार्फत एकूण ३५,५९,१००/- रुपयांचा मुद्देमाल जप्त करण्यात आला असून आरोपींवर गुन्हे दाखल करण्यात आले आहेत.
१) बेरळी फाटा येथे गुटखा जप्त; एक आरोपी अटकेत
दिनांक १०/०७/२०२६ रोजी मुखेड पोलिसांच्या पथकाला गुप्त बातमीदाराकडून मौजे बेरळी फाटा, ता. मुखेड येथे प्रतिबंधित गुटख्याची बेकायदेशीर विक्री होत असल्याची खात्रीशीर माहिती मिळाली. या माहितीच्या आधारे पोलीस पथकाने पंचांसह सदर ठिकाणी छापा टाकला असता, एक इसम अवैध गुटखा बाळगून त्याची विक्री करताना रंगेहात आढळला. पोलिसांनी त्याच्या ताब्यातून १४,१००/- रुपये किमतीचा गुटखा जप्त केला.
याप्रकरणी आरोपी संभाजी जयवंत शिंदे (वय १९ वर्षे, व्यवसाय-मजुरी, रा. बेळी, ता. मुखेड, जि. नांदेड) याच्याविरुद्ध मुखेड पोलीस ठाण्यात गु.र.नं. २१३/२०२६ नुसार भारतीय न्याय संहिता (BNS) कलम १२३, २७५, २२३ सह अन्न सुरक्षा व मानके कायद्यान्वये गुन्हा नोंदवून त्याला अटक करण्यात आली आहे.
२) बेटमोगरा येथे ३५ लाखांच्या हायवासह अवैध रेती जप्त
दुसऱ्या एका कारवाईत, दिनांक १०/०७/२०२६ रोजी मौजे बेटमोगरा येथील पेट्रोल पंपासमोर पोलिसांनी सापळा रचून संशयास्पद वाटणारा एक हायवा टिप्पर (क्र. TS-15 UE-0444) अडवला. सदर वाहनाची पाहणी केली असता, त्यामध्ये विनापरवाना चोरटी वाहतूक केली जाणारी अंदाजे ०९ ब्रास अवैध लाल रेती (किंमत ४५,०००/- रुपये) आढळून आली. पोलिसांनी ४५ हजारांची रेती आणि सुमारे ३५,००,०००/- रुपये किमतीचा भारत बेंझ हायवा टिप्पर असा एकूण ३५,४५,०००/- रुपयांचा मुद्देमाल जप्त केला.
या कारवाईत आरोपी चालक अजित पंढरीनाथ पाटील (वय ३५ वर्षे, रा. पिंपळगाव, ता. देगलूर) याच्याविरुद्ध मुखेड पोलीस ठाण्यात गु.र.नं. २१४/२०२६, कलम ३०३(२) BNS सह जमीन महसूल अधिनियम कलम ४८(७), ४८(८) प्रमाणे गुन्हा दाखल करण्यात आला आहे.
या पथकाने केली धडक कामगिरी: सदर यशस्वी कारवाई पोलीस अधीक्षक मा. श्री डॉ. निलाभ रोहन यांच्या मार्गदर्शनाखाली मुखेड पोलीस ठाण्याचे पोलीस निरीक्षक चितांबर कामठेवाड, पोउपनि गणेश माने, पोउपनि अभिजित तुतुरवाड तसेच पोलीस अंमलदार यादव इबितवार (पो.कॉ/४०१), शंकर बेलाडे (पो.कॉ/११०५), वीरभद्र पाटील (पो.कॉ/८७०), मन्मथ गौड (पो.कॉ/३६६) आणि अमोल सुंडगे (पो.कॉ/३२९०) यांच्या पथकाने अत्यंत चोखपणे पार पाडली.
बेकायदेशीर कृत्ये आढळल्यास पोलिसांशी संपर्क साधावा: जनसंपर्क अधिकारी नांदेड जिल्हा पोलीस दलाचे जनसंपर्क अधिकारी आशिष सिताराम बोराटे यांनी आवाहन केले आहे की, जिल्ह्यात कोणत्याही प्रकारची अवैध गौण खनिज वाहतूक, साठवणूक किंवा अवैध गुटखा वाहतूक व विक्री होत असल्याचे निदर्शनास आल्यास नागरिकांनी तात्काळ जवळच्या पोलीस ठाण्यात किंवा पोलीस नियंत्रण कक्षाला माहिती द्यावी. माहिती देणाऱ्याचे नाव गुप्त ठेवले जाईल व अवैध कृत्यांवर कठोर कायदेशीर कारवाई केली जाईल.
