नांदेड १२ जुलै प्रतिनिधी
जिल्ह्यात अवैध अग्नीशस्त्रांविरोधात सुरू असलेल्या विशेष मोहिमेला मोठे यश आले आहे. नांदेडचे पोलीस अधीक्षक मा. श्री. डॉ. नीलाभ रोहन यांच्या मार्गदर्शनाखाली स्थानिक गुन्हे शाखेने (LCB) एका इसमाला गावठी पिस्तलसह रंगेहाथ ताब्यात घेतले आहे. या धडक कारवाईमुळे बेकायदेशीर शस्त्र बाळगणाऱ्या गुन्हेगारांमध्ये एकच खळबळ उडाली आहे.

लिंबाच्या झाडाजवळ रचला सापळा

१२ जुलै २०२६ रोजी स्थानिक गुन्हे शाखेचे पोलीस निरीक्षक यांच्या आदेशाने पोउपनि महेश कोरे व त्यांचे पथक पेट्रोलिंग करत होते. भाग्यनगर पोलीस ठाणे हद्दीतील गुरुजी चौक ते श्रीनिवास मंगल कार्यालय जाणाऱ्या रस्त्यावरील एका लिंबाच्या झाडाजवळ एक व्यक्ती गावठी पिस्तल विक्री करण्याच्या उद्देशाने थांबली असल्याची खात्रीशीर गोपनीय माहिती पोलिसांना मिळाली.
माहिती मिळताच पोलिसांनी दोन पंचांच्या उपस्थितीत तातडीने सापळा रचला. पोलिसांना पाहताच संबंधित इसम पळून जाण्याचा प्रयत्न करत होता, मात्र सतर्क पोलिसांनी पाठलाग करून त्याला अत्यंत शिताफीने ताब्यात घेतले.

कमरेला खोसलेली सिल्वर रंगाची पिस्तल जप्त

पोलिसांनी पकडलेल्या संशयिताची अंगझडती घेतली असता, त्याच्या कमरेला पॅन्टमध्ये खोसलेली एक गावठी बनावटीची, सिल्वर रंगाची पिस्तल (मॅगझिनसह) आढळून आली. आरोपीकडे या अग्नीशस्त्राचा कोणताही वैध परवाना नव्हता. पोलिसांनी सुमारे ₹३०,०००/- किमतीची ही पिस्तल जप्त केली आहे.

चौकशीत धक्कादायक खुलासा; मुख्य विक्रेता फरार

ताब्यात घेतलेल्या आरोपीचे नाव मंगेश विनोदराव लोलगे (वय ३४ वर्षे, रा. यशवंतनगरी युनिट क्र. ३, मोहन नगर, नांदेड; व्यवसाय – मजुरी) असे आहे. पोलिसांच्या कसून चौकशीत त्याने धक्कादायक खुलासा केला. ही पिस्तल त्याने बालाजी बबन सांगळे (रा. गॅस गोडाऊनच्या मागे, वसरणी, नांदेड) याच्याकडून खरेदी केल्याची कबुली दिली.
याप्रकरणी मंगेश लोलगे याला अटक करण्यात आली असून, मुख्य विक्रेता बालाजी सांगळे हा सध्या फरार आहे. पोलीस त्याचा कसून शोध घेत आहेत. या दोन्ही आरोपींविरुद्ध भाग्यनगर पोलीस स्टेशन येथे भारतीय शस्त्र अधिनियम, १९५९ चे कलम ३/२५ व ७/२५ अन्वये गुन्हा दाखल करण्याची प्रक्रिया सुरू असून पुढील तपास केला जात आहे.

या पथकाने केली कारवाई

ही यशस्वी कारवाई पोलीस अधीक्षक मा. श्री. डॉ. नीलाभ रोहन, पोलीस निरीक्षक अतुल भोसले यांच्या मार्गदर्शनाखाली पोउपनि महेश कोरे, पोलीस अंमलदार श्रीराम दासरे, संघरत्न गायकवाड, मनोज राठोड, सुधाकर देवकत्ते, पवार, भीमराव लोणे, माने, महेश बडगू (सर्व नेमणूक स्थानिक गुन्हे शाखा, नांदेड) यांच्या पथकाने पार पाडली.

नांदेड पोलिसांचे आवाहन:
जिल्ह्यात कोणत्याही प्रकारची अवैध शस्त्र बाळगणे, विक्री करणे किंवा अशा हालचालींची माहिती असल्यास नागरिकांनी त्वरित नजीकच्या पोलीस ठाण्यास किंवा नांदेड नियंत्रण कक्षाशी संपर्क साधावा. माहिती देणाऱ्याचे नाव पूर्णपणे गोपनीय ठेवले जाईल, असे आवाहन पोलीस अधीक्षक कार्यालयाचे जनसंपर्क अधिकारी आशिष सिताराम बोराटे यांनी केले आहे.

बातमी प्रतिनिधी: माधव वाघमारे