नांदेड रविवार दि १९ जुलै २०२६
नांदेड ग्रामीण पोलीस ठाण्याच्या हद्दीतील पुणेगाव-आमदुरा गोदावरी नदीच्या पुलावर काल घडलेल्या कार अपघाताच्या घटनेला आता एक अत्यंत धक्कादायक आणि थरकाप उडवणारे वळण मिळाले आहे. सुरुवातीला अपघात वाटणाऱ्या या घटनेमागील भीषण वास्तव शवविच्छेदन (Post-Mortem) अहवालातून समोर आले असून, संपूर्ण जिल्हा या घटनेमुळे हादरून गेला आहे.
अपघातापूर्वीच मुलांची हत्या
मिळालेल्या माहितीनुसार, पुलावरून कार नदीत टाकण्यापूर्वीच शिक्षक सुनील मोरे यांनी आपल्या १२ वर्षांच्या मुलीची आणि १० वर्षांच्या मुलाची धारदार शस्त्राने निर्घृण हत्या केली होती, अशी धक्कादायक व खळबळजनक माहिती वैद्यकीय अहवालातून उघड झाली आहे. काल नदीपात्रातून कारसह तिघांचे मृतदेह बाहेर काढण्यात आले होते. सुरुवातीला हा घातपात की अपघात असा संशय व्यक्त केला जात असताना, शवविच्छेदन अहवालाने पोलिसांनाही चक्रावून टाकले आहे.
मृत सुनील मोरे यांच्याविरुद्धच गुन्हा दाखल
पोटच्या दोन निष्पाप मुलांची गळा चिरून हत्या केल्यानंतर शिक्षक सुनील नारायण मोरे यांनी स्वतः कारसह नदीत उडी घेऊन आपली जीवनयात्रा संपवली. या अत्यंत गंभीर प्रकरणी पोलीस अंमलदाराच्या फिर्यादीवरून मृत सुनील नारायण मोरे यांच्याविरुद्ध भारतीय न्याय संहिता (BNS) २०२३ चे कलम १०३(१) आणि २३८ अन्वये खुनाचा गुन्हा दाखल करण्यात आला आहे.
या घटनेमुळे परिसरात तीव्र हळहळ व्यक्त होत असून, एका शिक्षकाने आपल्याच मुलांसोबत असे पाऊल का उचलले, याचा अधिक तपास नांदेड ग्रामीण पोलीस करत आहेत.
वृत्त संकलन: प्रतिनिधी माधव वाघमारे, नांदेड
